म. टा. प्रतिनिधी, वाळूज महानगर वाळूज 'एमआयडीसीतील तिरंगा चौकात महिला विशेष पोलिस अधिकारी (एसपीओ) यांनी एका दुचाकीस्वराला अडवून 'तू रँग साइड आला आहेस,' असे म्हणत पैसे मागितले. ते घेत असताना एकाने त्याचे व्हिडिओ चित्रिकरण केले आहे. येथील तिरंगा चौकात दोन महिला 'एसपीओ' दुचाकीस्वारांना अडवून त्यांच्याकडून शंभर रुपये घेत असल्याचा व्हिडिओ सोशल मीडियावर प्रसारित करण्यात आला. पोलिसांना मदत व्हावी यासाठी परिसरातील पुरुष व महिला यांची विशेष पोलिस अधिकारी म्हणून नियुक्ती करण्यात आली होती. वाळूज एमआयडीसी पोलिस ठाण्याचे कार्यक्षेत्र मोठे असून, येथे कंपनीत कामासाठी देशातील विविध भागातून कामगार आले असल्याने येथील लोकसंख्या वाढली आहे, मात्र लोकसंख्येच्या तुलनेत येथील पोलिस अधिकारी व कर्मचारी यांची संख्या तोकडी आहे यात 'एसपीओ'ची नियुक्ती झाल्याने पोलिसांवरील ताण कमी होईल, अशी अपेक्षा होती. त्यांनी वेगळाच मार्ग अवलंबल्याने पोलिसांचीच अडचण होत आहे. यापूर्वीही असेच काही प्रकार उघडकीस आले होते त्यानंतर अनेकांची तेथून हकालपट्टी केली होती, मात्र आजच्या या घटनेने त्यांनी पुन्हा उद्योग सुरू केल्याचे सिद्ध झाले आहे. याकडे वरिष्ठांनी लक्ष देवून कारवाई करावी, अशी मागणी नागरिकांतून होत आहे. या महिला 'एसपीओ' अनेक दिवसापासून वाळूज एमआयडीसी पोलिस ठाण्यात पोलिसाबरोबर दिसत होत्या. त्यांनी पोलिसांसोबत अनेक कारवायांमध्ये भाग घेतल्याने त्या पोलिस कर्मचारी असल्याची नागरिकांची धारणा झाली असावी. त्यामुळे मोठी कारवाई करून जास्तीचा दंड भरावा लागेल, अशी भिती दाखवून या 'एसपीओ' दुचाकीचालकांकडून दररोज पैसे घेत असल्याची चर्चा झाल्यानंतर त्यांचा पैसे घेतानाच व्हिडिओ चित्रित करून सोशल मीडियावर प्रसारित करण्यात आला.
मोबाइल अॅप डाउनलोड करा आणि राहा अपडेट
