म. टा. प्रतिनिधी, औरंगाबाद
स्वातंत्र्यवीर सावरकर प्रेमी मित्रमंडळाचे १२ वे स्वातंत्र्यवीर सावरकर संमेलन यंदा १४ डिसेंबर रोजी हंपी (कर्नाटक) येथे होणार आहे, अशी माहिती संमेलनाध्यक्ष प्रा. स्नेहल पाठक, निमंत्रक भाऊ सुरडकर यांनी शनिवारी पत्रकारांना दिली.
सुरडकर म्हणाले, 'संस्थेने यापूर्वी औरंगाबाद,भगूर, सेमाडोह, अंदमान, मॉरेशिअस, श्रीलंका, दुबई, लंडन, सिंगापूर, इंडोनेशिया, जपान या ठिकाणी संमेलने भरविली आहेत. हंपी गावाचा मोठी ऐतिहासिक पार्श्वभूमी आहे. जगातील कला, संस्कृती, आविष्कार असलेले धार्मिक स्थान आहे. संमेलनात प्रमुख वक्ते म्हणून योगेश सोमण, डॉ. सी. एस. वासुदेवन, प्रा. एन. शहाजी, रणजित सावरकर, प्रा. नंदकुमार नाईक, शंकरराव गायकर, गायक प्रमोद सरकटे यांची उपस्थिती असणार आहे,' असे त्यांनी स्पष्ट केले. स्वातंत्र्यवीर सावरकर यांचे विचार सर्वदूर नेण्याचा प्रयत्न मंडळ सातत्याने करत असते. या संमेलनासोबत सहा दिवस बदामी, हंपी मुरडेश्वर, गोकर्ण महाबळेश्वर या स्थळांना भेटीचे आयोजन करण्यात आले आहे. सहभाग नोंदविण्यासाठी तसेच अधिक माहितीसाठी भाऊ सुरडकर, ५९, मयूरबन कॉलनी, शहानूरवाडी येथे संपर्क साधावा, असे आवाहन करण्यात आले आहे. यावेळी डॉ. नंदकुमार नाईक, प्रमोद सरकटे, किशोर वैद्य, सुभाष कुमावत, विजय जहागिरदार, किरण सराफ, सागर निळकंठ, नारायणराव कुलकर्णी, मीना पिसोळे आदी उपस्थित होते.