म. टा. प्रतिनिधी, पैठण एसटी महामंडळाच्या पैठण डेपोतून लांब पल्ल्याच्या व धार्मिक क्षेत्रांना जोडणाऱ्या अनेक बस बंद करण्यात आल्या आहेत. या बस सुरू कराव्यात, अशी मागणी भारतीय जनता युवा मोर्चाने करण्यात आली होती. या निवेदनाची दखल घेऊन महामंडळाने शुक्रवारी पैठण-शेगाव बससेवा सुरू केली आहे. मागील काही महिन्यांपासून पैठण-पुणे, पैठण-मुंबई, पैठण-सुरत, पैठण-सोलापूर यांच्यासह धार्मिक क्षेत्रांना जोडणारी पैठण-पंढरपूर, पैठण-तुळजापूर या लांब पल्ल्याच्या बस बंद करण्यात आल्या आहेत. यामुळे शहर व तालुक्यातील भाविक व नागरिकांना मोठा त्रास सहन करावा लागत आहे. या सर्व बस पुन्हा सुरू करण्याची मागणी करणारे निवेदन भाजयुमोतर्फे जिल्हा सरचिटणीस प्रशांत आव्हाड यांनी महामंडळाला दिले होते. भाजयुमोचे प्रदेश उपाध्यक्ष दत्ता गोर्डे यांनी याकरिता पाठपुरावठा केल्यानंतर एसटी महामंडळाने १५ दिवसांपूर्वी पैठण-तुळजापूर बस सुरू केली. आता शुक्रवारपासून पैठण-शेगाव ही बससेवा पूर्ववत सुरू करण्यात आली आहे. याप्रसंगी आगार व्यवस्थापक सुभाष तरवडे, गजानन मडके, नजन, सुरेश दुबाले, संतोष धापटे, सचिन ज्योतिक, संजीव कोरडे, चालक संजय रिंढे, वाहक सत्यप्रेम नरवडे, परागे आदी उपस्थित होते.
मोबाइल अॅप डाउनलोड करा आणि राहा अपडेट
