नेत्रपेढीच्या परवाना नूतनीकरणासाठी चक्क वर्षानुवर्षे लागत असून, लालफितीच्या कारभाराचा फटका शहरातील नेत्रदानाला बसतो आहे. शहरातील 'दृष्टी आय बँके'ला तब्बल दीड वर्षानंतर परवाना मिळाला आहे, तर काही नेत्रपेढ्यांच्या परवाना नूतनीकरणाची प्रतीक्षा अजूनही कायम आहे. विशेष म्हणजे घाटीच्या नेत्रपेढीच्या परवान्याचे नूतनीकरणही झालेले नाही.
नेत्रदान आणि नेत्ररोपणासाठी नेत्रपेढीला परवाना लागतो आणि दर तीन वर्षांनी परवान्याचे नूतनीकरण करावे लागते. मात्र गेल्या काही वर्षांपासून नेत्रपेढ्यांच्या परवाना नूतनीकरणाची प्रक्रिया रखडली असून, नेत्रपेढी चालकांना वारंवार खेटे मारूनही आरोग्य विभागाकडून दाद मिळत नसल्याचे दुर्दैवी चित्र कायम आहे. विविध कागदपत्रांच्या नावाखाली टाळाटाळ केली जात असल्याचा आरोपही अनेक नेत्रपेढी चालकांनी 'महाराष्ट्र टाइम्स'शी बोलताना केला. विशेष म्हणजे आवश्यक कागदपत्रे दिल्यानंतरही प्रत्येक वेळी नवनवीन कागदपत्रे मागितली जातात आणि त्यामुळेच नेत्रपेढीचालक पुरते वैतागले आहेत. महत्त्वाचे म्हणजे जोपर्यंत परवान्याचे नूतनीकरण होत नाही, तोपर्यंत नियमानुसार नेत्रदान व नेत्ररोपण केले जाऊ शकत नाही. याचा थेट परिणाम नेत्रदान चळवळीला बसला असून, शहरातील इच्छुकांना नेत्रदानासाठी शहरामध्ये फार कमी पर्याय उपलब्ध आहेत. त्यामुळेच अनेकजण जालन्यातील गणपती नेत्रालयाच्या माध्यमातून नेत्रदान करताना दिसून येत आहेत.
टोलवाटोलवी, अपमानास्पद वागणूक
शहरातील 'दृष्टी आय बँके'ने सप्टेंबर २०१३ मध्ये परवाना नूतनीकरणासाठी अर्ज केला होता, तर मार्च २०१५ मध्ये परवाना प्राप्त झाला. परवान्यासाठी वारंवार पाठपुरावा केला होता आणि आवश्यक ती सर्व कागदपत्रे मागितल्यानंतर त्या त्या वेळी देण्यात आली होती. मात्र तरीही आरोग्य विभागाकडून अपेक्षित सहकार्य कधीच मिळाले नसल्याचे समजते. या संदर्भात आरोग्य अधिकाऱ्यांकडून टोलवाटोलवी केली जाते, अपमानास्पद वागळूक दिली जात असल्याचेही काही नेत्रपेढी चालकांनी 'मटा' सांगितले.
माझ्या नेत्रपेढीचा परवाना नूतनीकरण दीड वर्षानंतर झाले. सतत पाठपुरावा करूनही दाद मिळत नाही. त्यामुळे नेत्रदान व नेत्ररोपण करता येत नाही. अनेक नातेवाईकांची इच्छा असून परत पाठवावे लागते.
डॉ. सुनील कसबेकर, दृष्टी आय बँक.
परवाना नूतनीकरणाचे काम आरोग्य सचिवांकडून होते. शहरातील नेत्रपेढी चालकांचे अर्ज मुंबईला पाठवण्यात आले आहे. काहीवेळी कागदपत्रांची कमी राहिल्यास विलंब होऊ शकतो.
- डॉ. जी. एम. गायकवाड, जिल्हा शल्यचिकित्सक
मी परवाना नूतनीकरणासाठी दोन वर्षांपासून पाठपुरावा करतो आहे. मात्र नूतनीकरण न झाल्यामुळे आता माझा उत्साह पूर्णपणे मावळला आहे.
- डॉ. संतोष अग्रवाल, नेत्रपेढीचालक.
मोबाइल अॅप डाउनलोड करा आणि राहा अपडेट
