म. टा. प्रतिनिधी, औरंगाबाद
मुकुंदवाडीतील राजर्षी शाहू विद्यालयातील शिक्षकांनी त्यांच्या शाळेतील विद्यार्थ्यांना चौथीच्या शिष्यवृत्ती परीक्षेत कॉप्या पुरविल्या व उत्तरे सांगितल्याचा प्रकार घडला आहे. या परीक्षा केंद्रावर पालकांनी मुख्याध्यापक व शिक्षणाधिकाऱ्यांना चांगलेच धारेवर धरले होते. दुसरीकडे ज्ञानप्रकाश विद्यामंदिरमध्ये चौथीची प्रश्नपत्रिका सातवीला, तर सातवीची चौथीच्या विद्यार्थ्यांना देण्यात आल्याने गोंधळ उडाला होता.
महाराष्ट्र राज्य परीक्षा परिषदेतर्फे इयत्ता चौथी व इयत्ता सातवीच्या विद्यार्थ्यांची शिष्यवृत्ती परीक्षा घेण्यात आली. या परीक्षेला मराठवाड्यातून ३ लाख ४४ हजार ३० विद्यार्थी परीक्षेला बसले होते. या परीक्षेत शहरातील काही केंद्रावर चांगलाच गोंधळ उडाला. मुकुंदवाडी परिसरातील राजर्षी शाहू विद्यालयात 'मास कॉपी' झाल्याची तक्रार पालकांनी शिक्षणाधिकाऱ्यांकडे केली आहे. या शाळेतील शिक्षकांनी त्यांच्या इंग्रजी माध्यमाच्या विद्यार्थ्यांना कॉपी पुरविल्याचा आरोप आहे. शिक्षकांनी विद्यार्थ्यांना प्रश्नांची उत्तरे लिहून दिली, उत्तरे सांगितली, असी तक्रार पालक व विद्यार्थ्यांनी केली आहे. ही बाब लक्षात आणून दिल्यानंतरही मुख्याध्यापकांनी दुर्लक्ष केल्याचे पालकांनी सांगितले. शिक्षणाधिकाऱ्यांना दिलेल्या निवेदनावर आर. सोनवणे, सचिन कुलकर्णी, विजय भंडे, सुनील गंडे, मुधरा पांडे, जयश्री सरकटे, वनिता बिरारे, स्वाती पाटील, दिपाली कांबळे, संतोष नंदागवरे, शुभांगी विडेकर, मनोज पवार आदींच्या स्वाक्षऱ्या आहेत. याबाबत शाळेच्या मुख्याध्यापकांना शशिकला बिराजदार यांच्याकडे विचारणा केली असता, त्यांनी असे घडले नाही, असा दावा केला आहे.
ज्ञानप्रकाश विद्यालयात प्रश्नपत्रिका बदलल्या
ज्ञानप्रकाश विद्यामंदिरमध्ये चौथीच्या विद्यार्थ्यांना सातवीचा, तर सातवीच्या विद्यार्थ्यांना चौथीची प्रश्नपत्रिका देण्यात आली होती. ही बाब विद्यार्थ्यांनी पर्यवेक्षकांना लक्षात आणून दिली. हा प्रकार समजल्याने पालकांनी संताप व्यक्त केला. त्यानंतर चूक दुरुस्त करण्यात आली. या केंद्रावर विद्यार्थ्यांना अतिरिक्त वेळ देण्यात आला.
ज्ञानप्रकाश विद्यामंदिरात केंद्रप्रमुख, पर्यवेक्षकांच्या चुकीमुळे त्रास झाला. त्यांना नोटीस देण्यात आली आहे. शाहू विद्यालयातील प्रकाराबाबत चौकशी समिती नेमली आहे. ही चौकशी सोमवारी करण्यात येईल.
नितीन उपासनी, शिक्षणाधिकारी
शिक्षक आपल्याच शाळेतील विद्यार्थ्यांना प्रश्नांची उत्तरे सांगत होते. हा प्रकार अत्यंत चूक आहे. चौथीच्या शिष्यवृत्ती परीक्षेत, असे प्रकार होत असतील, तर विद्यार्थ्यांवर काय संस्कार होतील. ही परीक्षा पुन्हा घ्यावी.
वनिता बिरारे, पालक
कॉपी प्रकरणाबाबत पालकांनी मुख्याध्यापकांना सांगितले. परंतु, त्यांनी उलट पालकांनाच दरडावले. आम्ही शिक्षण विभागालाही निवेदन सादर केले आहे.
विजय भंडे, पालक
मोबाइल अॅप डाउनलोड करा आणि राहा अपडेट
