म. टा. प्रतिनिधी, औरंगाबाद
'निवडणुकीत तिकीट देण्याची वेळ आल्यावर नेत्यांच्या बायकांनाच प्राधान्य देता, आता त्यांनाच आंदोलनासाठी आणि कार्यक्रमाला बोलवा. आम्ही काय फक्त झेंडे उचलायला आणि मोर्चे काढायलाच आहोत काय,' असा संतप्त सवाल शिवसेना महिला आघाडीच्या प्रमुख पदाधिकाऱ्यांनी केला आहे. या आक्रमक पदाधिकाऱ्यांनी बुधवारी (८ एप्रिल) समर्थनगर येथील शिवसेना प्रचार कार्यालयात पक्षाच्या पदाधिकाऱ्यांना जाब विचारला. त्यांनी प्रचारावर बहिष्कार टाकण्याचा इशारा दिला आहे.
महापालिका निवडणुकीतील शिवसेनेच्या उमेदवारांची यादी मंगळवारी (७ एप्रिल) जाहीर करण्यात आली. या यादीत महिला आघाडीच्या एकाही कार्यकर्तीचे नाव नव्हते. त्यामुळे बुधवारी दुपारी महिला आघाडीच्या प्रमुख कार्यकर्त्या शिवसेनेच्या समर्थनगर येथील प्रचार कार्यालयात पोहोचल्या. जिल्हासंघटक सुनीता आऊलवार, अनिता मंत्री, प्रतिभा जगताप, ज्योती काथार, सुचेता अंबेकर, माधुरी जोशी, नलिनी महाजन, सविता सुराळे, कांता गाडे, शोभा बडे, विणा यादव आदींनी एकदम आक्रमक भूमिका घेतली. या संदर्भात 'मटा' शी बोलताना ज्योती काथार म्हणाल्या, महापालिका निवडणुकीत महिलांना ५० टक्के आरक्षण मिळाले आहे. शिवसेनेच्या वाट्याला महिलांसाठी आरक्षित झालेल्या वॉर्डांपैकी २५ वॉर्ड आले आहेत. यापैकी काही वॉर्डांमधून महिला आघाडीच्या कार्यकर्त्यांना उमेदवारी द्या, अशी आमची मागणी होती. क्रांतिचौक वॉर्डातून मी आणि ज्योतीनगर वॉर्डातून सुनीता आऊलवार यांनी उमेदवारी मागितली होती, पण आम्हा दोघींनाही डावलण्यात आले. ज्योतीनगर मधून गिरजाराम हळनोर यांच्या पत्नीला उमेदवारी देण्यात आली. नेत्यांच्या बायकांनाच उमेदवारी मिळणार असेल, तर आम्ही काय फक्त झेंडेच उचलायचे का? महापौर कला ओझा यांना विधानसभेची उमेदवारी दिली, आता महापालिकेचीही उमेदवारी दिली. उमेदवारी देण्यासाठी कला ओझाच पक्षाच्या नेत्यांना दिसत असतील, तर आम्ही काम कशासाठी करायचे? त्यामुळे प्रचारावर बहिष्कार टाकण्याचा विचार आम्ही करीत आहोत. शिवसेनाप्रमुख गेले आणि आमचा आधार गेला. पक्षप्रमुख उद्धव ठाकरे यांच्या पर्यंत आमच्या भावना पोहोचू दिल्या जात नाहीत.'
प्रतिभा जगताप म्हणाल्या, 'शिवसेनेतही महिलांवर अन्याय होतो हे आता स्पष्ट झाले आहे. तीस - तीस वर्षांपासून आम्ही शिवसेनेचे काम करीत आहोत. आता आमचा उमेदीचा काळ आहे, त्यामुळे आम्हाला उमेदवारी मिळाली पाहिजे, असे आमचे म्हणणे होते, पण पक्षाच्या नेत्यांनी महिला आघाडीच्या कोणत्याही कार्यकर्त्याचे म्हणणे मानले नाही. नेत्यांच्या बायकांनाच तिकिटे दिली गेली. नेत्यांच्या बायकांनाच तिकिटे द्यायची असतील, तर यापुढे त्यांनाच आंदोलनाला, प्रचाराला बोलवा. आमच्या भावना पक्षप्रमुख उद्धव ठाकरेंपर्यंत पोहचू दिल्या जात नाहीत. त्यामुळे त्यांच्यापर्यंत भावना पोहोचाव्यात यासाठी आम्ही हे पाऊल उचलले आहे.'
जिल्हाप्रमुख सामोरे गेले
महिला आघाडीच्या संतप्त झालेल्या कार्यकर्त्यांना जिल्हाप्रमुख अंबादास दानवे सामोरे गेले. त्यांनी या कार्यकर्त्यांची समजूत काढली. न्याय देण्याचे आश्वासन त्यांनी दिले, पण महिला कार्यकर्त्या ऐकून घेण्याच्या मनःस्थितीत नव्हत्या. काहींनी पक्षाकडे दिलेला बायोडाटा जाळून टाकण्याची भूमिका घेतली, पण त्यांना अन्य कार्यकर्त्यांनी थांबवले.
मोबाइल अॅप डाउनलोड करा आणि राहा अपडेट
