मराठवाडा अध्यापक कॉलेज परीक्षा केंद्रावर पर्यवेक्षक, भरारी पथकाकडून परीक्षार्थींना हेतूपुस्सर त्रास दिला जात असल्याचा प्रकार समोर आला आहे. यासंदर्भात जयप्रकाश नारायण अध्यापक महाविद्यालयाच्या विद्यार्थ्यांनी कुलगुरूंकडे निवेदनाद्वारे तक्रार दिली आहे. दरम्यान, मराठवाडा अध्यापक कॉलजच्या प्राचार्यांनी मात्र या प्रकरणाशी कॉलेजचा संबंध नसल्याचे म्हटले आहे.
विद्यापीठातर्फे बी.एड अभ्यासक्रमाची परीक्षा घेतली जात आहे. यात मराठवाडा बी.एड. कॉलेज परीक्षा केंद्र आहे. या केंद्रावर हेतूपुस्सर त्रास दिल्याची तक्रार जयप्रकाश नारायण बी. एड. कॉलेजच्या विद्यार्थ्यांनी केली आहे. शुक्रवारी परीक्षा केंद्रावर सकाळी ९ वाजून १० मिनिटांनी भरारी पथकाने हॉलतिकीट बघून सात विद्यार्थ्यांचे पेपर काढून घेतले. इतरांचेही पेपर घेण्यात आले होते, परंतु त्यांना पेपर लगेचच परत देण्यात आले. सात विद्यार्थ्यांवर कारवाई करण्यात आली. जबरदस्तीने हमीपत्र लिहून घेण्यात आल्याचेही विद्यार्थ्यांनी सांगितले. तेरा कॉलेजचे विद्यार्थी परीक्षा केंद्रावर असताना, जयप्रकाश नारायण अध्यापक कॉलेजच्याच विद्यार्थ्यांना त्रास का? असा सवाल त्यांनी उपस्थित केला. हेतूपुरस्कर त्रास देण्यात येत असल्यामुळे इतर केंद्रावर परीक्षा घेण्यात यावी, भरारी पथकाची चौकशी करण्याची मागणी केली आहे.
कॉलेजांचा वाद
डॉ. बाबासाहेब आंबेडकर मराठवाडा विद्यापीठातंर्गत असलेल्या कॉलेजांमधील वादाचा फटका विद्यार्थ्यांना बसत असल्याची चर्चा आहे. पंधरा दिवसापूर्वी मराठवाडा अध्यापक कॉलेजमधील विद्यार्थ्यांनी व्हायवा झाला नसल्याने विद्यापीठात धाव घेतली होती. यानंतर आता हा प्रकार समोर आला आहे. यामुळे असे प्रकार म्हणजे विद्याशाखेतील अंतर्गत राजकारणाचा हा परिणाम असल्याचेही बोलले जाते आहेत.
विद्यार्थ्यांना हेतूपुस्सर त्रास दिला जात आहे. तेरा कॉलेजांमधील विद्यार्थी केंद्रावर असताना आमच्याच कॉलेजच्या विद्यार्थ्यांवर कारवाई का? याबाबत आमच्या विद्यार्थ्यांनी कुलगुरूंकडे तक्रार केली आहे.
- डॉ. राजीव सातव, प्राचार्य, जयप्रकाश नारायण कॉलेज.
भरारी पथक हे विद्यापीठाकडून नेमले जात असते. या भरारी पथकाकडून ही कारवाई करण्यात आली आहे. या कारवाईत कॉलेज हस्तक्षेप करू शकत नाही. त्यामुळे या प्रकरणाशी आमच्या कॉलेजचा संबंध जोडणे चुकीचे आहे.
- डॉ. सोहल अहमद खान, प्राचार्य, मराठवाडा अध्यापक महाविद्यालय
मोबाइल अॅप डाउनलोड करा आणि राहा अपडेट
