मोंढा नाका चौकात उभारण्यात येणाऱ्या उड्डाणपुलाच्या शेजारून करण्यात आलेल्या पर्यायी रस्त्यावर अक्षरशः एकेक फूट खोलीचे खड्डे पडले आहेत. कंत्राटदाराने उड्डाणपुलाशेजारील साइडपट्टीचे डांबरीकरण केले, मात्र या खड्ड्यांकडे दुर्लक्ष केल्याचा फटका नागरिकांना बसत आहे. या ठिकाणी दररोज किमान दहा अपघात होत आहेत.
मोंढा नाका उड्डाणपुलाच्या दक्षिणेकडील बाजूने आकाशवाणीकडून येणाऱ्या वाहनांसाठी पर्यायी रस्ता केला आहे. पाच फुटांचा हा रस्ता सुरुवातीपासूनच अरूंद आहे. महाराष्ट्र राज्य रस्ते विकास महामंडळाने (एमएसआरडीसी) महापालिकेला सांगूनही या रस्त्यावरील अतिक्रमणे हटलेली नाहीत. त्यात अॅपेरिक्षा कुठेही आणि कशाही उभ्या राहतात. त्यामुळे सकाळी व सायंकाळी गर्दीच्या वेळी नेहमीच ट्रॅफिक जॅम होते. मोंढा चौकापासून अमरप्रीत हॉटेलकडे येताना तसेच सिंचन भवनाच्या जवळ जिथे उड्डाणपूल सुरू होतो. त्याठिकाणी कायम ही समस्या आहे. मध्यंतरी वाहतूक सुरळीत करण्यासाठी ट्रॅफिक पोलिस उभा करण्यात आला होता, पण आता पुन्हा पहिले पाढे पंचावन्न अशी परिस्थिती आहे.
सर्व वाहने या साइडपट्टीच्या रस्त्यावरून जात असल्याने रस्ता वारंवार उखडला. त्याची मलमपट्टी केली गेली, पण गेल्या महिनाभरापासून दुरुस्तीकडे दुर्लक्ष झाल्यामुळे कुशलनगरच्या रस्त्यालगत एक फुटाचे चार मोठे खड्डे या छोट्या रस्त्यावर पडले आहेत. त्यात कायम पाणी साचून राहते. उड्डाणपुलालगत असलेल्या रस्त्यावर तीन दिवसांपूर्वी डांबरीकरण करण्यात आले. पण हे खड्डे बुजविण्यासाठी काहीच पावले उचलली गेली नाहीत. भरधाव येणारी वाहने खड्डा पाहून हळू होतात. मागच्या वाहनांना त्याची कल्पना येत नाही आणि एकमेकावर वाहने आदळण्याचे प्रमाण वाढले आहे. या खड्ड्यांजवळ दररोज किमान दहा अपघात होत असल्याचे आजूबाजूच्या व्यापाऱ्यांनी सांगितले.
उड्डाणपूल कार्यान्वित होईपर्यंत साइडपट्ट्यांचे मजबुतीकरण करण्याचे कंत्राटादाराला सांगितले होते. त्यानुसार डांबरीकरण केले आहे. रस्त्यावरील खड्डे बुजविण्याबाबत तत्काळ सांगून कार्यवाही केली जाईल.
- उदय भरडे, उपअभियंता, एमएसआरडीसी.
मोबाइल अॅप डाउनलोड करा आणि राहा अपडेट
