म. टा. प्रतिनिधी, औरंगाबाद
शहरात पाणी, रस्ते, वीज, कचरा याच समस्या भेडसावत असताना महापालिकेच्या सत्तेत असलेल्या शिवसेना - भाजप युतीने २५ वर्षांत काय केले, असा संतप्त सवाल नागरिकांनी युतीच्या आमदारांना विचारला. 'मटा डिबेट' च्या कार्यक्रमात गुरुवारी नागरिकांनी विकासाच्या मुद्यावरून प्रश्नांचा भडिमार केला.
महापालिका निवडणुकीच्या पार्श्वभूमीवर देवगिरी महाविद्यालयाच्या हिरवळीवर गुरुवारी महाराष्ट्र टाइम्स तर्फे 'मटा डिबेट' चे आयोजन करण्यात आले. त्यात शिवसेनेचे आमदार संजय शिरसाट, भाजपचे आमदार अतुल सावे, राष्ट्रवादीचे आमदार सतीश चव्हाण, एमआयएमचे आमदार इम्तियाज जलील, भारिप-बहुजन महासंघाचे गौतम लांडगे आणि रिपाइं आठवले गटाचे कार्याध्यक्ष बाबुराव कदम सहभागी झाले. प्रारंभी नेत्यांनी पक्षाची भूमिका मांडली. नागरिकांनी आमदारांसाठी प्रश्न लिहून दिले. यापैकी निवडक प्रश्न नेत्यांना विचारण्यात आले. बहुतांश प्रश्न युतीच्या आमदारांना उद्देशून होते. रस्त्यांच्या अवस्थेबद्दल नागरिकांनी जाब विचारला. पालिकेत शिवसेना-भाजपची सत्ता २५ वर्षांपासून आहे. आता खड्ड्यांचे शहर अशी ओळख निर्माण झाली आहे, याला जबाबदार कोण ? शहरात तिसऱ्या दिवशी पाणी मिळते, पण पाणीपट्टी पूर्ण वसूल का केली जाते? नागरिकांचे हीत न जपणारी 'समांतर' योजना तयार का केली? घनकचरा व्यवस्थापनाचा उडालेला बोजवारा, बंद पडलेले पथदिवे, बससेवा अशा अनेक विषयांवर नागरिकांनी प्रश्न विचारले. कार्यक्रमाचे प्रास्ताविक 'मटा' चे निवासी संपादक धनंजय लांबे यांनी केले. सिनीअर असिस्टंट एडिटर प्रमोद माने यांनी सूत्रसंचालन व आभार प्रदर्शन केले.
आता केंद्रात आणि राज्यात आता युतीचे सरकार आहे. पालकमंत्र्यांनी विकासासाठी निधी देणे सुरू केले आहे. प्रगतीच्या दिशेने शहराची वाटचाल सुरू झाली आहे. त्यात तुमचा हातभार राहू द्या.
- संजय शिरसाट, शिवसेना.
महापालिकेला काँग्रेसची राजवट असलेल्या केंद्र व राज्य सरकारने सावत्रपणाची वागणूक दिली. आता आमचे सरकार आले आहे, आम्ही या शहराचा विकास करू.
- अतुल सावे, भाजप.
महापालिकेच्या सत्ताधाऱ्यांनी बीओटीचा बाजार मांडला, सिटीबसचा प्रकल्प, घनकचऱ्यासंबंधीचा रॅमकीचा प्रकल्प बंद पडला. एकही योजना पूर्णत्वास न नेणारी महापालिका असा या महापालिकेचा लौकिक आहे.
- सतीश चव्हाण, राष्ट्रवादी.
जाती धर्माच्या नावावर जेव्हा निवडणूक लढवली जाते तेव्हा विकासाचे मुद्दे मागे पडतात. त्यामुळे चांगल्या उमेदवारांना निवडून द्या.
- इम्तियाज जलील, एमआयएम
विकासकामांसाठी निधी उपलब्ध करून देण्यात दुजाभाव झाला. पुढच्या काळात सर्व आमदारांनी ठरवले तर आपले शहर पुढे जाईल.
- बाबुराव कदम, रिपाइं.
निवडणुकीसाठी आम्ही शहर बचाव मोर्चाची स्थापना केली आहे. ५३ उमेदवार उभे केले आहेत. मतदारांना जो उमेदवार सक्षम वाटतो त्याला मतदारांनी निवडून द्यावे.
- गौतम लांडगे, भारिप.
मोबाइल अॅप डाउनलोड करा आणि राहा अपडेट
