म. टा. प्रतिनिधी, औरंगाबाद
औरंगाबाद महापालिकेच्या सत्तेत भारतीय जनता पक्षाला निम्मा वाटा हवा आहे. भाजपने महापौर पदावर दावा केला असून, तसा प्रस्ताव मित्रपक्ष शिवसेनेला शुक्रवारी सादर केला. यावेळी सत्तेतला निम्म्या वाटा देण्याची मागणी भाजपने केली. त्यावर युतीच्या नेत्यांमध्ये सुमारे दोन तास चर्चा झाली. एमआयएमच्या प्रवेशामुळे यंदाची महापालिका निवडणूक चांगलीच रंगतदार ठरली. त्यात कॉँग्रेस, राष्ट्रवादी कॉँग्रेस स्वबळावर लढल्याने आणि अपक्षांनी लावलेल्या ताकदीमुळे अनेक वॉर्डांत अटीतटीचा सामना पाहण्यास मिळाला. अखेर जनतेने पुन्हा एकदा युतीच्या पारड्यात कौल दिला. गेल्या निवडणुकीत शिवसेनेचे ३० सदस्य होते. यंदा हा आकडा २८ वर आला.
भाजपच्या मात्र आठ जागा वाढल्या असून एकूण २३ नगरसेवक विजयी झाले. मात्र, स्पष्ट बहुमत न मिळाल्याने सत्ता स्थापनेसाठी युतीला आता बंडखोर, अपक्षांची मदत घ्यावी लागत आहे. गेल्या टर्ममध्ये कमी जागा मिळाल्याने सत्ता वाटपात भाजपला दुय्यम स्थान देत शिवसेनेने पाच वर्ष महापौरपद स्वतःकडे ठेवले. यंदा मात्र महापौरपदासाठी भाजप आग्रही आहे. सत्तास्थान वाटपासंदर्भात शुक्रवारी युतीच्या नेत्यांची बैठक झाली. यात खासदार चंद्रकांत खैरे, शिवसेना नेते प्रदीप जैस्वाल, अंबादास दानवे, भाजपचे आमदार अतुल सावे, शहराध्यक्ष भगवान घडमोडे, प्रदेश प्रवक्ते शिरीष बोराळकर, डॉ. भागवत कराड, संजय केणेकर आदी उपस्थित होते.
यात सत्तेत पन्नास टक्के वाटा मिळाला पाहिजे तसेच महापौर पदाची पहिली संधी द्या, असा प्रस्ताव भाजपने सेनेसमोर ठेवला. या काळात उपमहापौर सेनेला दिले जावे, असे भाजप नेत्यांनी म्हटले आहे. स्थायी समितीसह अन्य पदाबाबतही याप्रसंगी चर्चा झाली. मात्र, शिवसेनाही महापौरपदासाठी आग्रही आहे. त्यामुळे या बैठकीत अंतिम निर्णय होऊ शकला नाही. यासंदर्भात उद्या (शनिवारी) युतीच्या नेत्यांची पुन्हा बैठक होणार आहे. दरम्यान, यासंदर्भात अधिकृत माहिती देण्यास शिवसेनेच्या नेत्यांनी नकार देत पक्षश्रेष्ठींच्या आदेशानुसारच निर्णय घेतला जाईल, असे सांगितले.
महापौरपद निवडणूक वेळापत्रक
उमेदवारी अर्ज वितरित करणेः २५ एप्रिल दुपारी ३पर्यंत.
अर्ज स्वीकारणेः २५ एप्रिल पावणेसहापर्यंत.
अर्जांची छाननीः महापौर, उपमहापौरपदाच्या निवडणुकीसाठी २९ एप्रिल रोजी विशेष सभा सुरू झाल्यावर सभागृहात पिठासन अधिकारी अर्जांची छाननी करतील.
अर्ज मागे घेणेः छाननीनंतर वैध अर्ज पिठासन अधिकारी जाहीर करतील. त्यानंतर उमेदवारी अर्ज मागे घेण्यासाठी १५ मिनिटांचा अवधी दिला जाणार आहे. त्यानंतर गरज पडल्यास महापौर व उपमहापौर पदासाठी निवडणूक घेतली जाईल.
महापौरपदासह अन्य पदाबाबत शिवसेनेच्या नेत्यांना प्रस्ताव देण्यात आला आहे. शुक्रवारी युतीच्या नेत्यांची बैठक झाली. त्यात चर्चा झाली असून शनिवारी याबाबत निर्णय घेतला जाईल.
- अतुल सावे, आमदार भाजप
युतीच्या नेत्यांमध्ये सकारत्मक चर्चा झाली. सत्तेत पन्नास टक्के वाटा मिळावा, अशी अपेक्षा आहे. दोन्ही बाजूने प्रस्ताव देण्यात आले आहेत.
- शिरीष बोराळकर, प्रदेश प्रवक्ते, भाजप
भाजप नेत्यांसोबत चर्चा झाली. महापौर, उपमहापौरसह अन्य पदाचे वाटप कसे व्हावे, यासंदर्भात चर्चा झाली असून पक्षश्रेष्ठांना माहिती कळविण्यात आली. अंतिम निर्णय पक्षश्रेष्ठी घेतील.
- अंबादास दानवे, शिवसेना नेते
मोबाइल अॅप डाउनलोड करा आणि राहा अपडेट
