महापौर, उपमहापौरपदाचा उमेदवार देण्यावरून भारतीय जनता पक्षाचे प्रदेशाध्यक्ष रावसाहेब दानवे यांनी शनिवारी विधानसभेचे अध्यक्ष हरिभाऊ बागडे आणि ग्रामविकास मंत्री पंकजा मुंडे यांचा गेम केला. निष्ठावंतांना डावलत बंडखोरी केलेल्या आणि नव्याने प्रवेश केलेल्यांना उमेदवारीची खैरात देण्यात आली. उमेदवारीवरून दुपारी दोन ते सायंकाळी साडेपाचपर्यंत नाट्य रंगले.
महापौरपदाची निवडणूक २९ एप्रिल रोजी आहे. त्यासाठी शनिवारी सायंकाळी पावणेसहापर्यंत अर्ज स्वीकारले जाणार होते. पहिले महापौरपद आम्हाला द्या अशी मागणी भाजपच्या नेत्यांनी केली होती, पण त्यावर मुंबईत झालेल्या युतीच्या बैठकीत काहीच निर्णय झाला नाही. त्यामुळे शिवसेनेने महापौरपदासाठी अर्ज दाखल केलेला असला तरी, भाजपनेही त्यासाठी अर्ज दाखल करण्याचा निर्णय घेतला.
भगवान घडमोडे आणि राजू शिंदे महापौरपदाच्या शर्यतीत आले. उपमहापौरपदासाठी नितीन चित्ते यांचे नाव निश्चित करण्यात आले होते. शिंदेंचे नाव महापौरपदासाठी निश्चित होत असतानाच नगरसेवक राजू तनवाणी यांची एन्ट्री झाली. तोपर्यंत उपमहापौरपदासाठी चित्ते यांचे नाव कायम होते. याचवेळी आमदार अतुल सावे आणि भाजपचे प्रदेश चिटणीस सुजितसिंह ठाकूर महापालिकेत आले. त्यांच्या चर्चेत तनवाणी यांनी माघार घेतली आणि शिंदे यांचे नाव महापौरपदासाठी ठरविण्यात आले. शिंदे आणि चित्ते अर्ज भरणार असे वाटत असताना ठाकूर यांनी चित्ते यांना थांबवले आणि प्रमोद राठोड यांचे नाव उपमहापौरपदासाठी जाहीर केले. त्यामुळे भाजपच्या निष्ठावान कार्यकर्ते व पदाधिकाऱ्यांमध्ये अस्वस्थता निर्माण झाली. प्रदेशाध्यक्ष रावसाहेब दानवे यांच्याशी संपर्क साधून ठाकूर यांनी राठोड यांचे नाव पुढे केले.
अंतर्गत वाद उफाळला
पालिकेतील वाद हरिभाऊ बागडे आणि पंकजा मुंडे यांच्या कानावर गेला. त्यांनी ठाकूरांना फोन करून बदलाबद्दल तीव्र नाराजी व्यक्त केली. महापौरपदासाठी भाजपने शिंदे यांना उमेदवारी दिली, त्यांनी यापूर्वी बंडखोरी केली होती, त्यामुळे त्यांना काढून टाकण्यात आले होते. राठोड काँग्रेस मधून भाजपमध्ये आले, त्यामुळे निष्ठावंतांना डावलल्याची भावना आहे.
मोबाइल अॅप डाउनलोड करा आणि राहा अपडेट
