म. टा. प्रतिनिधी, औरंगाबाद
पैठणकर आणि जालनेकर रेल्वे मार्गावरून सोमवारी (४ मे) सुभेदारी विश्रागृहात भिडले. यावेळी पैठणचा रेल्वे मार्ग वळविलाच नाही म्हणणारे खासदार रावसाहेब दानवे यांच्यासमोर मराठवाडा रेल्वे विकास समितीचे ओमप्रकाश वर्मा यांनी मार्ग वळविल्याचे पुरावे ठेवले. तेव्हा दानवे क्षणात शांत झाले. 'मी जालनेकरांचाही नाही आणि पैठणकरांचाही नाही,' असे म्हणत सपशेल माघार घेतली.
सोलापूर-जळगाव रेल्वे मार्ग पैठणला टाळून तो जालन्याहून वळविण्यात आला, असा आरोप पैठणकरांनी केला होता. याबद्दल त्यांनी निदर्शनेही केली. तेव्हा खासदार दानवे यांनी आपण हा मार्ग वळविलाच नाही. पैठणकरांनी या मार्गाबाबत कसलिही मागणी रेल्वेकडे केली नव्हती, असा दावा करत पैठणकरांना खुले चर्चेचे आव्हान दिले होते. हे आव्हान स्वीकारत सोमवारी पैठणकर सुभेदारीवर पोहचले. खासदार दानवे यांच्या आगमनापूर्वी जालनेकरांनी कसा मार्ग वळविला याबाबत चर्चा सुरू होती. त्यावेळी जालन्याहून आलेल्या मंडळींनी आपली बाजू पैठणकरांसमोर आक्रमकपणे मांडण्याचा प्रयत्न केला. तेव्हा पैठणकरही आक्रमक झाले. दोन्हीकडून घोषणाबाजी सुरू झाली. पोलिसांनी मध्यस्थी करत दोन्ही कार्यकर्त्यांना सुभेदारी बाहेर काढले.
खासदार रावसाहेब दानवे यांच्यासोबत दुपारी बारा वाजता पैठणकरांची बैठक सुरू झाली. तेव्हा सोलापूर जळगाव रेल्वे मार्ग पैठणहून जालन्याला कसा वळविला, याचे पुरावे मराठवाडा रेल्वे विकास समितीचे ओमप्रकाश वर्मा यांनी ठेवले. तेव्हा हा मार्ग वळविलाच नाही म्हणणाऱ्या दानवे यांनी आपल्या भूमिकेवरून यू टर्न घेतला. बैठकीला पैठणचे माजी आमदार संजय वाघचौरे, प्रा. संतोष तांबे, मनोहर निकम, किशोर थोरे, साईनाथ कासोळ, महेश बोंबले, दिनेश दुधार, लक्ष्मण वाघमारे आदी उपस्थित होते.
सर्वेक्षणाबाबत गुप्तता
सोलापूर-जळगाव रेल्वे मार्गाच्या सर्वेक्षणाबाबत ठेवलेली गुप्तता संशयास्पद असल्याचे ओमप्रकाश वर्मा यांनी सांगितले. सदर मार्ग तयार करण्याचा निर्णय तत्कालीन रेल्वे मंत्री लालूप्रसाद यादव यांनी घेतला होता. हा मार्ग हा पैठणहून व्हावा अशी इच्छा व्यक्त केली होती, अशी माहिती नाना चव्हाण यांनी दिली. माजी आमदार संजय वाघचौरे यांनी 'साहेब तुम्ही भेदभाव करू नका. हा मार्ग पैठणहूनच होईल अशी घोषणा करा,' अशी मागणी केली.
दानवेंचे घुमजाव
पैठणचा रेल्वे मार्ग कसा वळविला, याचे पुरावे ओमप्रकाश वर्मा यांनी ठेवले. तेव्हा कागदपत्रे मिळाली नसल्याचे दानवे यांनी सांगितले. वर्मा यांनी दिल्लीला तुमचे पी.ए. अमित भुसारी यांना कागदपत्रे दिल्याचे सांगताच दानवेंनी आपले शब्द मागे घातले. मार्ग वळविल्याचे पुरावे देताच त्यांनी घुमजाव केले. दानवे म्हणाले, 'जालना आणि पैठण माझाच भाग असल्याने कुणाचीही बाजू घेणार नाही. रेल्वे मंत्र्यांसमोर जालना, पैठणचे प्रत्येकी पाच प्रतिनिधी बोलावून वादाचा सोक्षमोक्ष लावू. कमिट्यांवर मराठवाड्याची बाजू मांडण्यासाठी एखादयाची नियुक्ती करतो.'
मी शपथेवर कुठंही सांगितलं नाही की हा मार्ग जालन्याहून होईल की पैठणहून होईल. मी बजेटवरही बोललो नाही. मी जिवंत राजकारणी आहे. आमचं घर काचेचं असतं. कोणीही येऊन दगड मारू शकतो. जालना जसं माझं तसंच पैठण माझं. तुम्ही माझ्या जागी खासदार असता तर काय केलं असतं?
- रावसाहेब दानवे, खासदार
पैठणहून सोलापूर जळगाव रेल्वे मार्ग झाला पाहिजे, पैठणकरांची भूमिका आहे. मात्र, कारण सांगून लोकप्रतिनिधी पैठणकरांची दिशाभूल करत आहेत. दुःख म्हशीला इंजेक्शन पखालीला या म्हणी प्रमाणे हा कारभार सुरू आहे. पैठणहून रेल्वे मार्ग झाल्याशिवाय आम्ही स्वस्थ बसणार नाही. - नितीन देशमुख,
सरचिटणीस, क्रांतिसेना.
पंतप्रधान रेल्वे योजनेत, मागासलेले शहरे जोडण्यासाठी रेल्वे मार्ग तयार करण्याचे नियोजन आहे. माजी राष्ट्रपती प्रतिभाताई पाटील यांनी हा रेल्वे मार्ग जालन्याहून मंजूर केला आहे. पैठणकरांनी विरोध करण्याचे काहीही कारण नाही. या रेल्वे मार्गामुळे जालन्याचा विकास होईल.- फिरोज अली,
रेल्वे संघर्ष समिती, जालना
मोबाइल अॅप डाउनलोड करा आणि राहा अपडेट
