म. टा. प्रतिनिधी, औरंगाबाद
शहराच्या विकासासाठी पाच वर्ष प्रतीक्षा करण्याची गरज नाही. विकासकामे करून वर्षभरात शहराचा चेहरामोहरा बदलू, असा शब्द महापौर त्र्यंबक तुपे यांनी शनिवारी दिला. 'मटा'तर्फे 'औरंगाबाद रायझिंग' उपक्रमांतर्गत आयोजित करण्यात आलेल्या कार्यक्रमात ते बोलत होते.
'स्मार्ट सिटी'च्या दिशेने वाटचाल करीत असलेल्या औरंगाबाद शहरातील नागरिकांच्या नवनिर्वाचित नगरसेवकांकडून काय अपेक्षा आहेत, याची जाणीव करून देण्यासाठी 'महाराष्ट्र टाइम्स'ने हॉटेल अजंठा अँबेसेडर येथे शनिवारी एका अभिनव उपक्रमाचे आयोजन केले होते. या कार्यक्रमासाठी सर्वच नगरसेवकांना निमंत्रित करण्यात आले होते. यावेळी महापौर त्र्यंबक तुपे बोलत होते. व्यासपीठावर उपमहापौर प्रमोद राठोड, सभागृह नेता राजेंद्र जंजाळ, 'महाराष्ट्र टाइम्स'च्या औरंगाबाद आवृत्तीचे निवासी संपादक धनंजय लांबे उपस्थित होते. मोठ्या संख्येने नगरसेवक या कार्यक्रमाला हजर होते.
कार्यक्रमाच्या सुरुवातीला धनंजय लांबे यांनी शहर विकास आणि शहरासंबंधीच्या महत्त्वाच्या मुद्यांबद्दल पॉवर पॉइंट प्रेझेंटेशन केले. प्रेझेंटेशन करताना ते म्हणाले, '११३ नगरसेवकांपैकी बहुतेक जण प्रथमच निवडून आलेले आहेत. त्यामुळे येत्या पाच वर्षाच्या काळात शहर विकासाचे काम करताना नगरसेवकांनी कोणती 'बेस लाइन' लक्षात ठेवली पाहिजे हे लक्षात आणून देण्यासाठी या कार्यक्रमाचे आयोजन करण्यात आले आहे. शहराचा सर्वांगिण आणि समतोल विकास झाला पाहिजे, अशी 'मटा'ची भूमिका आहे.' हाच मुद्दा कार्यक्रमाची मध्यवर्ती कल्पना राहिला.
हाच धागा पकडून महापौर त्र्यंबक तुपे म्हणाले, 'शहर विकासासाठी पाच वर्ष प्रतीक्षा करण्याची वेळ येणार नाही. एका वर्षात विकास करू आणि संपूर्ण शहराचा चेहरामोहरा बदलून टाकू. महापालिकेत नगरसेवकांची नवीन टीम आलेली आहे. नव्याने आलेले नगरसेवक काम करून घेण्याच्या बाबतीत फार फास्ट आहेत. त्यांचे सहकार्य घेऊन शहराच्या विकासाचे नियोजन केले जाईल. सर्व नगरसेवकांना त्यांच्या वॉर्डातील विकासासाठी निधी मिळाला पाहिजे. सर्व वॉर्डांचा समतोल विकास झाला पाहिजे, यासाठीही येत्या काळात नियोजन केले जाईल. शिक्षण, क्रीडा, साफसफाई, दिवाबत्ती, रस्ते हे विषय महत्त्वाचे आहेतच, या संबंधींची कामे सुरू झाली आहेत. चौकांच्या सौंदर्यीकरणासाठी अनेक उद्योजक, स्वयंसेवी संस्थांनी पुढाकार घेतला आहे. त्यामुळे येत्या काही महिन्यात प्रमुख चौकांचे रूप पालटलेले दिसेल. पुढच्या महिन्यात शाळा सुरू होत आहेत, तोपर्यंत सिटीबसचे नियोजन करण्याचा विचारही सुरू आहे. महापालिकेत निवडून आलेला प्रत्येक नगरसेवक वॉर्डाचा, शहराचा विकास करण्याचा विचार घेऊनच आला आहे हे लक्षात घेतले पाहिजे. त्याच दृष्टीने त्यांना मदत करून येत्या काळात शहराचा सर्वांगीण विकास केला जाईल. शहराच्या विकासासाठी जे जे करता येणे शक्य आहे, ते ते सर्व आम्ही सगळे मिळून करू. प्रत्येक कामात नागरिकांचा सहभाग आवश्यक आहे. लोकसंख्या वाढत आहे तसा शहराचा विस्तारही होत आहे. विकास कामांचे नियोजन करताना याचाही विचार करावा लागणार आहे.' कार्यक्रमाचे प्रास्ताविक व सूत्रसंचालन सीनिअर असिस्टंट एडिटर प्रमोद माने यांनी केले.
जी भूमिका 'मटा'ची, तीच आमची
शहराचा विकास हीच भूमिका 'महाराष्ट्र टाइम्स'ने मांडली आहे, असे सांगत महापौर त्र्यंबक तुपे म्हणाले, 'निवडून आलेल्या प्रत्येक नगरसेवकाची भूमिका शहराचा विकास हीच असते आणि असली पाहिजे. शहराचा विकास झाला पाहिजे, समस्या सुटल्या पाहिजेत अशी भूमिका 'मटा'ने मांडली आहे, आमची पण तीच भावना आहे. 'मटा'ने पॉवर पॉइंट प्रेझेंटेशनच्या माध्यमातून शहर विकासाच्या संबंधीच्या अडचणी सांगितल्या आणि त्यावर उपायही सुचविले, त्याबद्दल 'मटा'ला धन्यवाद दिले पाहिजेत.'
मोबाइल अॅप डाउनलोड करा आणि राहा अपडेट
