बँक अधिकारी असल्याची थाप मारून ४२ हजार रुपयांचा ऑनलाइन गंडा घातल्याचा प्रकार समोर आला आहे. बँक अधिकारी असल्याचे सांगून एटीएम कार्डसंबंधी गोपनीय कोड मिळवून ही फसवणूक करण्यात आली. याप्रकरणी जवाहरनगर पोलिस ठाण्यात गुन्हा दाखल करण्यात आला आहे.
मनोहर राजाराम गायकवाड (वय ५६, रा. विष्णुनगर) असे फिर्यादीचे नाव आहे. त्यांची मुलगी पल्लवीच्या मोबाइलवर १० जून रोजी एका भामट्याने फोन केला. त्याने बँक अधिकारी असल्याचे सांगितले. एटीएम कार्ड बंद होईल, अशी थाप त्याने मारली. कार्ड बंद होऊ नये म्हणून एटीएम कार्डवरील सोळा अंकी क्रमांक आणि सात अंकी क्रमांक सांगावेत, असे तो म्हणाला. फोनवर बोलणारी व्यक्ती बँक अधिकारी असावी, असे गृहित धरून पल्लवीने भामट्याला माहिती दिली. त्यानंतर त्याने या क्रमांकांचा त्याचा वापर करून फिर्यादीच्या बँक खात्यातून ४२ हजार ०२० रुपयांची ऑनलाईन खरेदी केली. हा प्रकार लक्षात येताच गायकवाड यांनी पोलिसांकडे धाव घेतली. याप्रकरणी अधिक तपास पोलिस निरीक्षक सलीम शेख करत आहेत.
मोबाइल अॅप डाउनलोड करा आणि राहा अपडेट