म. टा. प्रतिनिधी, औरंगाबाद
वरूणराजाने पाठ फिरविल्याने मराठवाड्यातील शेतकरी, कष्टकऱ्याच्या मुलांना उच्च शिक्षण घेणे अवघड झाले आहे, मात्र डॉ. बाबासाहेब आंबेडकर मराठवाडा विद्यापीठाच्या व्यवस्थापन परिषद सदस्य युरोपवारीला निघाले आहेत. तेही विद्यापीठाच्या खर्चातून. अभ्यासदौऱ्याच्या नावाखाली परिषदेचे आठ सदस्य युरोप दौऱ्यावर निघाले आहेत.
विद्यापीठातील व्यवस्थापन परिषदेचे आठ सदस्य २ ऑगस्टपासून अभ्यासदौऱ्यावर निघणार आहेत. त्यासाठी विद्यापीठ सुमारे १४ लाखा रुपये खर्च करीत आहेत. सदस्य इटली, बेल्जिअम, स्विर्त्झलँड, फ्रान्स, जर्मनी या देशांच्या अभ्यासदौऱ्यावर जाणार आहेत. दौऱ्यावर डॉ. शिवाजी मदन, डॉ. दत्तात्रय आघाव, डॉ. मेहर पाथ्रीकर, डॉ. स्मिता अवचार, डॉ. गीता पाटील, डॉ. गणेश शेटकार, डॉ. वसंत सानप, संजय निंबाळकर हे सदस्य जात आहेत. त्यापैकी निंबाळकर हे स्वखर्चाने अभ्यासदौऱ्यात सहभागी होत आहेत. या व्यवस्थापन परिषद सदस्यांची मुदत ३१ ऑगस्ट रोजी संपणार आहे. त्यामुळे त्यांच्या अभ्यासदौऱ्याचा विद्यापीठाला किती लाभ होईल, याबद्दल शंका आहे.
हे सदस्य हॉटेल अँड टुरिझमचा अभ्यास करतील. त्याचबरोबर मॅनेजमेंट संस्था, विद्यापीठांना भेट देणार असल्याचे विद्यापीठाचे म्हणणे आहे. मराठवाड्यात दुष्काळाची परिस्थिती असताना, शेतकरी, कष्टकऱ्याच्या मुलांना उच्च शिक्षणाचे शुल्क भरणे अवघड झाले आहे. विद्यापीठातील वसतिगृह, ग्रंथालयांमध्ये पिण्याच्या पाण्यासाठी विद्यार्थी रस्त्यावर उतरत अाहेत. अशावेळी विद्यापीठाच्या तिजोरीतून हा खर्च केला जात आहे. व्यवस्थापन परिषद सदस्यांची मुदत ऑगस्ट रोजी संपणार आहे. यामुळे हा दौरा विद्यापीठाला किती फायदेशीर ठरेल याबाबत शांशकता आहे.
२५ लाखांची तरतूद
विद्यापीठाने दौऱ्यासाठी अर्थसंकल्पात २५ लाखांची तरतूद केलेली आहे. यातून दौऱ्यावर खर्च केला जात आहे. पाच देशांच्या दौऱ्यावर निघालेल्या प्रत्येक सदस्याला १ लाख ८० हजार रुपये विद्यापीठ खर्च देणार आहे. अनेक सदस्य कुटुंबीयांसह दौऱ्यावर जाणार असल्याचे सूत्रांनी सांगितले.
अभ्यासदौरा ही निरंतर चालणारी प्रक्रिया आहे. यात काही गैर आहे, असे मला वाटत नाही. हे सदस्य तेथील विद्यापीठांना भेट देतील. त्याचा अहवाल विद्यापीठाला सादर करतील. त्याचा विद्यापीठाला फायदाच होईल.
- डॉ. बी. ए. चोपडे, कुलगुरू, डॉ. बा. आं. म. विद्यापीठ
अभ्यासदौऱ्यात विद्यापीठ, तेथील संस्थांना भेटी दिल्या जाणार आहेत. यापूर्वी कुलगुरू, बीसीयूडी दौऱ्यावर गेले होते. यंदा परिषदेच्या सदस्यांसाठी हा दौरा आयोजित केला. त्याची प्रक्रिया मार्चपासून सुरू आहे. त्यामुळे यात काही गैर आहे, असे वाटत नाही.
- डॉ. शिवाजी मदन, व्यवस्थापन सदस्य, डॉ. बा. आं. म. विद्यापीठ
मोबाइल अॅप डाउनलोड करा आणि राहा अपडेट
