कर्जमुक्त झाले शेतकरी

September 3, 2015, 12:25 pm

≫ Next: म्हाडा घरांचा लूक बदलणार?

≪ Previous: वक्फ बोर्डात महिलांची भरती

$

0

0

म. टा. प्रतिनिधी, औरंगाबाद

सावकारी पाशात अडकलेले जिल्ह्यातील ७१६ शेतकरी कर्जमुक्त झाले आहेत. त्यांनी परवानाधारक सावकारांकडून घेतलेले कर्ज व त्यावरील व्याज अशी १ कोटी ३२ लाख रुपयांची रक्कम माफ करुन ती रक्कम संबंधित सावकारांना अदा करण्यात आली. उर्वरित १७ शेतकऱ्याच्या कर्ज प्रकरणासंबंधी प्रक्रिया सुरु आहे, अशी माहिती जिल्हा उपनिबंधक (सहकारी संस्था) एन. व्ही. आघाव यांनी मटाशी बोलताना दिली.

सातत्याने दुष्काळाचा सामना करावा लागत असलेल्या विदर्भ, मराठवाड्यातील शेतकऱ्यांना दिलासा मिळावा यासाठी शासनाने या विभागातील शेतकऱ्यांनी परवानाधारक सावकाराकडून घेतलेले संपूर्ण कर्ज शासनामार्फत भरून त्यांना कर्जमुक्त करण्याचा निर्णय २०१४ च्या हिवाळी अधिवेशनात घेतला होता. यात या दोन्ही विभागातील शेतकऱ्यांनी किंवा कुटुंबातील सदस्यांनी घेतलेले कर्ज व त्यावरील व्याज असे एकूण १७१ कोटी ३० लाख रुपये एवढे कर्ज संबंधित सावकारांना अदा करण्यास मान्यता देण्यात आली होती.

३० नोव्हेंबर २०१४ अखेरचे थकित कर्ज आणि ३० जून २०१५ पर्यंतचे व्याज एवढीच रक्कम या योजनेस पात्र ठरविण्यात आली होती. औरंगाबाद जिल्ह्यात परवानाधारक सावकारांनी या कालवधीत ५ कोटी ६० लाख रुपयांचे कर्जाचे वाटप केले. त्यापैकी शेतकऱ्यांकडे कर्ज व त्यावरील व्याज असे मिळून १ कोटी ३८ लाख रुपये थकीत असल्याचे तालुका व जिल्हा समितीने घेतलेल्या आढाव्यानंतर स्पष्ट झाले. त्यानुसार ७१६ शेतकऱ्यांचे एक कोटी ३२ लाख १७७ रुपयांचे कर्ज माफ झाले असून ही रक्कम संबंधित सावकारांना अदा करण्यात आली. अन्य १७ शेतकऱ्यांच्या कर्ज प्रकरणावर प्रक्रिया सुरू आहे.

अशा होत्या अटी : कर्जबाजारी व्यक्ती सातबारा शेतकरी किंवा त्याच्या कुटुबांतील सदस्य असावा, शिक्षापत्रिकेची छायाप्रत जोडण्यात यावी, कर्ज परवानाधारक सावकाराकडूनच घेतलेले असावे तसेच कर्जदार हा परवानाधारक सावकाराच्या कार्यक्षेत्रातील असावा, अशा अटी घालण्यात आल्या होत्या.

मोबाइल अॅप डाउनलोड करा आणि राहा अपडेट

---

म्हाडा घरांचा लूक बदलणार?

September 3, 2015, 12:27 pm

≫ Next: सोमवारी पेट्रोल पंपांचा संप

≪ Previous: कर्जमुक्त झाले शेतकरी

$

0

0

म. टा. प्रतिनिधी, औरंगाबाद

'सध्या म्हाडाच्या अनेक घरांना ग्राहक मिळत नाही. शेजारचा बिल्डर नियमांच्या कटकटी‌विना जर आमच्या घरांपेक्षा स्वस्त घर देत असेल तर म्हाडाचे घर कोण घेणार? सर्वसामान्यांना स्वस्तात दर्जेदार घर उपलब्ध करून देण्यासाठी म्हाडा आपल्या घरांचा लूक बदलणार आहे,' अशी माहिती गृहनिर्माण राज्यमंत्री रवींद्र वायकर यांनी दिली.

वायकर गुरुवारी शहरात होते. सुभेदारी विश्रामगृहात त्यांनी पत्रकारांशी संवाद साधला. यावेळी वायकर म्हणाले, 'म्हाडाचे अनेक ठिकाणी प्रकल्प तयार आहेत. मात्र, त्यांना किचकट अटींमुळे ग्राहक मिळत नाही. यासाठी लवकरच समितीवर बिल्डर, आर्किटेक्ट यांना घेण्यात येईल. त्यामुळे म्हाडाची घरे कमी जागेमध्ये उत्कृष्ट, दर्जेदार व आकर्षक तयार करण्यात येतील. येणाऱ्या काळामध्ये म्हाडाच्या घरांचे संपूर्ण डिझाइन बदलून टाकण्यात येणार आहे. स्वस्ताव घर देण्यासाठी नियमही बदण्यात येतील. मुंबईतील घरे दर्जेदार होतात मग इतर ठिकाणची का नाही,' असा सवालही त्यांनी केला.

राज्यभरात म्हाडाच्या घरांचे बांधकाम तयार करणारी एकच कंस्ट्रक्शन कंपनी आहे. या कंपनीला प्रतिस्पर्धी मिळाल्याशिवाय हे काम दर्जेदार होणार नाही, असे सांगत येणाऱ्या काळात बिल्डर बदलण्याची शक्यता असल्याचे संकेत राज्यमंत्री वायकर यांनी दिले.

नांदेड येथे गुरूतागद्दीच्या वेळी तसेच परतूर येथे इंटिग्रेटेड हाउसिंग प्रोजेक्ट अंतर्गत तयार करण्यात आलेल्या घरांची राज्यमंत्र्यांनी पाहणी केली. ही घरे अत्यंत निकृष्ट दर्जाची असल्यामुळे या प्रकल्पांची चौकशी झाल्याशिवाय पुढील पैसे देण्यात येणार नसल्याचे राज्यमंत्र्यांनी सांगितले. परतूर येथेही शहराच्या जवळ १७ कोटी खर्चून ८०० तर नांदेड येथे १,११३ कोटी खर्च करून २० हजार घरांचा प्रकल्प तयार करण्यात आला आहे.

मोबाइल अॅप डाउनलोड करा आणि राहा अपडेट

सोमवारी पेट्रोल पंपांचा संप

September 3, 2015, 12:28 pm

≫ Next: धडा शिकवण्यासाठी केले अपहरण

≪ Previous: म्हाडा घरांचा लूक बदलणार?

$

0

0

म. टा. प्रतिनिधी, औरंगाबाद

पेट्रोलवरील एलबीटी रद्द करा, या मागणीसाठी राज्यातील पेट्रोल पंप चालकांनी सोमवारी (७ सप्टेंबर) एक दिवसाचा लाक्षणिक संप पुकारला आहे, अशी माहिती 'फामपेडा'चे अध्यक्ष उदय लोध यांनी दिली.

शासनाने महापालिका क्षेत्रातील एलबीटी वसुली रद्द केली. यामुळे पालिका क्षेत्रातील व्यापाऱ्यांना दिलासा मिळाला. फेडरेशन ऑफ ऑल महाराष्ट्र पेट्रोल डिलर्स असोसिएशनेही (फामपेडा) पेट्रोलवरील एलबीटी रद्द करण्याची मागणी केली होती. मात्र, शासनाने ही मागणी नाकारली. त्याविरोधात हे आंदोलन करण्यात येत आहे. 'औरंगाबादमध्ये एलबीटी लागू असल्यामुळे पेट्रोल दीड रुपये महाग मिळते. सर्वसामान्य वाहनधारकांना स्वस्त पेट्रोल मिळावे यासाठी हे आंदोलन पुकारले आहे,' अशी माहिती औरंगाबाद पेट्रोल डिलर्स असोसिऐशनचे सचिव अखिल अब्बास यांनी दिली.

मोबाइल अॅप डाउनलोड करा आणि राहा अपडेट

धडा शिकवण्यासाठी केले अपहरण

September 3, 2015, 12:30 pm

≫ Next: मार्किंग मिटवून घर वाचवण्याचा प्रयत्न

≪ Previous: सोमवारी पेट्रोल पंपांचा संप

$

0

0

म.टा. प्रतिनिधी, औरंगाबाद

'दादा माझे अपहरण झाले आहे. मारहाण होत आहे,' बहिणीचा मोबाइलवरील मेसेज वाचून भावाने तडकाफडकी सिटीचौक पोलिस ठाणे गाठत गुन्हा नोंदवला. पोलिसांनी भोकरदन गाठत बहिणीला शोधून काढले. प्रत्यक्षात मात्र, हे अपहरण खोटे निघाले.

चित्रपटाला शोभणारा हा थरार बुधवारी सकाळी साडेसातपासून सुरू झाला. नारळीबाग येथील एका २४ वर्षाच्या तरुणाच्या मोबाइलवर त्याच्या बहिणीचा मेसेज धडकला. 'पडेगाव येथील रवी देशमुख या युनियन लिडरने मला पळवले आहे. रूममध्ये कोंडून मारहाण सुरू आहे,' असा उल्लेख त्यात होता. बहिणीवरील संकटाने भाऊराया व्याकूळ झाला. तरुणाने तत्काळ पोलिस ठाणे गाठून गुन्हा नोंदविला. सिटीचौक पोलिस ठाण्याच्या पीएसआय आजले यांनी तपास सुरू केला. मोबाइल क्रमांकावरून शोध घेण्यात आला. यावेळी या क्रमांकाचे टॉवर लोकेशन भोकरदन शहरात आढळले. पोलिसांनी भोकरदन गाठून शोध घेत सबंधित तरुणी व संशयित आरोपी रवी देशमुखला ताब्यात घेतले. त्यांनी दिलेल्या माहितीवरून वेगळीच कहाणी समोर आली. सबंधित तरुणी पतीसोबत राहत नाही. तिचा भाऊ तिला वारंवार पतीकडे नांदायला जाण्याची विनंती करायचा. त्याला धडा शिकवण्यासाठी तिने मित्राच्या मदतीने अपहरणाचा बनाव रचला. मात्र, पोलिसांच्या तपासात पितळ उघडे पडले, अशी माहिती पोलिस निरीक्षक नागनाथ कोडे यांनी दिली.

मोबाइल अॅप डाउनलोड करा आणि राहा अपडेट

मार्किंग मिटवून घर वाचवण्याचा प्रयत्न

September 3, 2015, 12:36 pm

≫ Next: दोन शेतक-यांची आत्महत्या

≪ Previous: धडा शिकवण्यासाठी केले अपहरण

$

0

0

म. टा. प्रतिनिधी, औरंगाबाद

महापालिकेचे मुख्य अ​​ग्निशमन अधिकारी शिवाजी झनझन यांच्या कुटुंबीयांनी जयभवानीनगरातील मुख्य रस्त्यावर अतिक्रमण करून टोलेजंग इमारती बांधल्या आणि त्यांना झनझन यांनी अतिक्रमण विभागाचा पदभार असताना संरक्षण दिले हे स्पष्ट झाले आहे. जनरेट्यामुळे त्यांच्या बहिणीचे घर आज पाडण्यात आले.

बुधवारी हे घर वाचविण्यात संबंधितांना यश आले, पण आज पुन्हा रस्त्याची मोजणी झाली तेव्हा झनझन यांच्या बहिणीच्या घरावरची मूळ मार्किंग मिटवून नवीन मार्किंग करण्यात आली असल्याचे स्पष्ट झाले. मुकुंदवाडी रेल्वेस्टेशन रस्त्याच्या रुंदीकरणाआड येणाऱ्या इमारती पाडून रस्ता २४ मीटर रुंद केला जात आहे. कोर्टाच्या आदेशाने महापालिकेने हे काम सुरू केले. अर्थात, पालिकेने नव्हे, तर पोलिस आयुक्त अमितेश कुमार यांनी त्यासाठी पुढाकार घेतला. बुधवारी पाडापाडी सुरू असताना महापालिकेच्या अधिकाऱ्यांनी दुजाभाव केल्याचे दिसून आले. झनझन यांचे बंधू आणि बहिणीचे बांधकाम वाचविण्याचा आटापिटा केला जात होता. जयभवानीनगर चौकाजवळ उजव्या बाजूला झनझन यांचे भाऊ श्रीकृष्ण झनझन याची इमारत आहे, तर डावीकडे त्यांच्या बहिणीचे घर आहे. संदीप उर्किर्डे यांच्या नावाने हे घर ओळखले जाते. बुधवारी श्रीकृष्ण झनझन यांची इमारत पाडण्यात आली, पण उकिर्डे यांच्या इमारतीकडे दुर्लक्ष केले गेले. या इमारतीची फक्त एक गॅलरी पथकाने पाडली. त्यामुळे नागरिकांमध्ये संतापाची भावना निर्माण झाली.

गुरुवारी उकिर्डे यांच्या इमारतीवर कारवाई का होत नाही, असा जाब नागरिकांनी विचारला. नगरसेवक भगवान घडमोडे, माजी नगरसेवक संजय चौधरी, दामुअण्णा शिंदे तेथे पोचले. उकिर्डे यांची इमारत का वाचवली जात आहे, असा सवाल त्यांनी केला. सर्वांना समान न्याय देण्याची मागणी त्यांनी केली. दुपारी तीनच्या सुमारास महापालिकेने या इमारतीवर कारवाई करण्याची तयारी केली, तेव्हा श्रीकृष्ण झनझन रस्त्यावर उतरले. त्यांनी अधिकाऱ्यांना कारवाईपासून रोखण्याचा प्रयत्न केला. उकिर्डे यांची इमारत रस्ता रुंदीकरणात येत नाही असे त्यांचे म्हणणे होते. शेजारची कैलास अप्पा कोठुळे यांची इमारत काल पाडण्यात आली. मार्किंगपेक्षा तीन फूट जास्त पाडल्याचा आक्षेप घेत कोठुळे यांनी फेरमोजणीची मागणी केली.

महापालिकेचे उपायुक्त अय्युब खान, नगररचना विभागाचे सहाय्यक संचालक डी.पी. कुलकर्णी, उपअभियंता ए.बी. देशमुख घटनास्थळी आले. त्यांनी रस्त्याचे मोजमाप घेतले तेव्हा कोठुळे यांचा दावा खरा असल्याचे स्पष्ट झाले. त्यानंतर उकिर्डे यांची इमारत साडेपाच ते सहा फूट पडते असे स्पष्ट झाले. अधिकाऱ्यांनी या इमारतीवर पूर्वी तशीच मार्किंग केली होती, पण ही मार्किंग मिटवून दुसरी मार्किंग करण्यात आली, त्यामुळे काल पाडापाडीत ही इमारत बचावली. रस्त्याची पुन्हा मोजणी केल्यावर उर्किर्डे यांची इमारत साडेपाच ते सहा फुटांपर्यंत पाडण्याचे काम सुरू करण्यात आले.

पुतळ्याला संरक्षण

जयभवानीनगर चौकात छत्रपती शिवाजी महाराजांचा पुतळा आहे. त्याशेजारची चार मजली इमारत रस्ता रुंदीकरणासाठी पाडण्यात आली. हे काम करताना पुतळ्याचे नुकसान होऊ नये म्हणून महापालिकेच्या पथकाने खबरदारी घेतली. जेसीबीच्या पंज्याचा उपयोग पुतळ्यावर छत्रीसारखा करण्यात आला. दोन क्रेनच्या सहाय्याने ही चार मजली इमारत पाडण्यात आली. इमारत पाडण्याचे काम तीन ते चार तास सुरू होते. या कालावधीत चौकातील वाहतूक थांबविण्यात आली होती. पाडापाडी पाहण्यासाठी चौकामध्ये गर्दी होती.

...तर झनझन यांची चौकशी

जयभवानी नगरमधील रस्ता रुंदीकरणाचे प्रकरण कोर्टाचे आदेश असतानाही इतके वर्षे रखडले ही वस्तुस्थिती आहे. रुंदीकरण होऊ नये व आपल्या मालमत्ता वाचाव्यात म्हणून महापालिकेचे मुख्य अग्निशमन अधिकारी शिवाजी झनझन यांनी दबावतंत्राचा वापर केल्याच्या या भागातील नागरिकांच्या तक्रारी आहेत. त्यांची दखल घेऊन झनझन यांची चौकशी करण्याचे आदेश महापालिकेच्या प्रशासनाला दिले जातील, अशी माहिती महापौर त्र्यंबक तुपे यांनी 'मटा' शी बोलताना दिली.

जयभवानीनगर ते मुकुंदवाडी रेल्वेस्टेशन या रस्त्याच्या रुंदीकरणाचे काम सध्या सुरू आहे. रुंदीकरणात शिवाजी झनझन यांचे बंधू श्रीकृष्ण झनझन व भाचा संदीप उकिर्डे यांच्या इमारती बाधित होत होत्या. यासंदर्भात महापौर तुपे यांच्याशी संपर्क साधला असता ते म्हणाले, 'विकास कामात कुणी आपल्या पदाचा वापर करून दबाव आणत असेल व विकास कामांना त्यामुळे अडथळा येत असेल तर, ते सहन केले जाणार नाही. रुंदीकरणाआड झनझन यांच्या भावाचे किंवा बहिणीचे घर असो किंवा महापौर, आयुक्तांचे घर असो, महापालिकेच्या प्रशासनाने कायद्यानुसारच कारवाई केली पाहिजे. या संपूर्ण प्रकरणात झनझन यांचा हस्तक्षेप असेल तर, त्याची चौकशी करण्याचे आदेश प्रशासनाला दिले जातील.' करमुल्य निर्धारक व संकलक या पदाची सूत्रे झनझन यांच्याकडून काढून घेतलेली असतानाही त्यांनी गुरुवारी कर वसुलीसंदर्भात अधिकाऱ्यांची बैठक घेतली. हेही गंभीर आहे. त्यांनी खरोखरच बैठक घेतली असेल तर, त्यांच्यावर कठोर कारवाई करण्यास प्रशासनाला भाग पाडू, असे महापौर म्हणाले.

...तरी घेतली बैठक

करमूल्य निर्धारक व संकलक पदाचा कार्यभार काढून घेतल्यानंतरही गुरुवारी महापालिकेचे मुख्य अग्निशमन अधिकारी शिवाजी झनझन यांनी कर वसुलीची आढावा बैठक घेतली. आयुक्तांच्या दालनातच त्यांनी संबंधित अधिकाऱ्यांना बोलावून सुमारे तासभर आढावा घेतला, अशी माहिती सूत्रांनी दिली. झनझन यांच्याकडे असलेला करमूल्य निर्धारक व संकलक पदाचा चार्ज काढून घेण्याचे आदेश महापौर त्र्यंबक तुपे यांनी २० ऑगस्ट रोजी झालेल्या सर्वसाधारण सभेत महापालिका प्रशासनाला दिले. झनझन यांच्याकडचा चार्ज काढल्यामुळे ते कमालीचे संतापले होते. आज महाजन बाहेरगावी होते. त्यामुळे झनझन सायंकाळी सहाच्या सुमारास महापालिकेत आले. त्यांनी महाजन यांच्या दालनात मालमत्ता कर वसुलीच्या कामावर असलेल्या सर्व अधिकाऱ्यांना बोलावून घेतले व वसुलीचा आढावा घेतला. यावेळी आयुक्तांचे स्वीय सहाय्यक एच.आर. बाहेती, संगणक कक्षाचे प्रमुख अब्दुल बारी उपस्थित होते, अशी माहिती सूत्रांनी दिली.

मोबाइल अॅप डाउनलोड करा आणि राहा अपडेट

दोन शेतक-यांची आत्महत्या

September 3, 2015, 12:37 pm

≫ Next: आली पाणीबाणी

≪ Previous: मार्किंग मिटवून घर वाचवण्याचा प्रयत्न

$

0

0

म. टा. प्रतिनिधी, उस्मानाबाद

कर्जबाजारीपणा, नापिकी आणि उपासमारीला कंटाळून उस्मानाबाद जिल्ह्यात गेल्या २४ तासांत दोन शेतकऱ्यांनी आत्महत्या केल्या.

मुख्यमंत्री देवेंद्र फडणवीस यांनी कालच उस्मानाबाद जिल्ह्यातील दुष्काळी भागाचा दौरा केला. त्यांच्या दौऱ्याला काही तास उलटताच जिल्ह्यात दोन शेतकऱ्यांनी जीवनयात्रा संपविली. पाटसांगवी (ता. भूम) येथील लक्ष्मण भाऊराव पाटील यांनी बुधवारी रात्री उशीरा गळफास घेऊन आत्महत्या केली. दुसऱ्या एका घटनेत उस्मानाबाद तालुक्यातील करजखेडा येथील शेतकरी योगेश विलास चव्हाण (वय १९) यांनी आत्महत्या केली. उस्मानाबाद जिल्ह्यात आतापर्यंत १०५ शेतकऱ्यांनी आत्महत्या केल्या आहेत.

मराठवाड्यात जानेवारी २०१५पासून आतापर्यंत ५७४ शेतकऱ्यांनी आत्महत्या केल्या आहेत. बीड जिल्ह्यात सर्वाधिक १६४ शेतकऱ्यांनी आत्महत्या केल्याची नोंद सरकार दरबारी आहे. ५७४पैकी ३६० शेतकरी आत्महत्यांची प्रकरणे मदतीसाठी पात्र ठरविली आहेत.

दरम्यान, उपासमारीला कंटाळून २९ ऑगस्टला पेटवून घेतलेल्या मनीषा गटकळ यांचा गुरुवारी सोलापूर येथील हॉस्पिटलमध्ये मृत्यू झाला. घरात भाकरी नसल्याने मनीषा यांनी टोकाचे पाऊल उचलत अंगावर रॉकेल ओतून घेतले, अशी चर्चा आहे. घरात नऊ माणसे असलेले अंभी (ता. भूम) येथील गटकळ कुटुंब उपासमारीने त्रस्त झाले होते.

मोबाइल अॅप डाउनलोड करा आणि राहा अपडेट

आली पाणीबाणी

September 3, 2015, 12:38 pm

≫ Next: धाक हवा, दहशत नको

≪ Previous: दोन शेतक-यांची आत्महत्या

$

0

0

म. टा. प्रतिनिधी, औरंगाबाद,

मराठवाड्यातील सर्वाधिक १६ तालुके असलेल्या नांदेड जिल्ह्याला यंदा मोठ्या पाणीटंचाईला सामोरे जावे लागत आहे. विष्णुपुरी प्रकल्पाची उभारणी केली त्यावेळी, आता नांदेड शहराला कधीही पाणी कमी पडणार नाही, असे मानले जात होते. प्रकल्पात पिण्यासाठी राखून ठेवलेल्या पाण्याची सातत्याने होऊ लागणी आणि नांदेड शहरावर पाणीटंचाईचे ढग निर्माण झाले.

नांदेड जिल्हा भीषण पाणीटंचाईचा सामना करत असून, गोदावरी नदीकाठच्या दोन्ही बाजूंने पाण्याची चोरी केली जाते. त्यावर ऊस, केळी हे पिके घेतली जातात. त्यामुळे ही टंचाई आहे ते निसर्गनिर्मित जशी तेवढीच प्रशासनामुळे निर्माण झालेली आहे. प्रकल्पातील पाणी कमी होत गेले. पाणीटंचाईची भिती निर्माण झाली. त्यावेळी प्रशसनाला पाणीचोरीची जाग आली. तोपर्यंत उशीर झाला होता.

दरम्यान, यंदा नांदेड शहरापेक्षा ग्रामीण भागात दुष्काळाची तीव्रता जास्त आहे. मुखेड, कंधार, लोहा तालुक्यांत दुष्काळामुळे नागरिकांना रोजगारासाठी शहरात जावे लागत आहे. जिल्ह्यामध्ये बहुतांश ठिकाणी खरिपाच्या पेरण्या वाया गेल्या. काही तालुक्यांमध्ये समाधानकारक

पाऊस झाला. तेथे काही प्रमाणात उत्पन्न होईल, मात्र त्यामध्ये मोठी घट होण्याची शक्यता आहे. जिल्ह्यातील नांदेड, मुदखेड, भोकर, उमरी, किनवट, माहूर, हदगाव, हिमायतनगर या तालुक्यांमध्ये पाऊस समाधानकारक असला तरी पिकांची स्थिती फारशी चांगली नाही. मराठवाड्यातील मोठे पशुधन जिल्ह्यामध्ये असून, यांना जगविण्याचा प्रश्नही उभा आहे.

जिल्ह्यामध्ये २ मोठे, ९ मध्यम तर, ८० लघुप्रकल्प असून, हे सर्व प्रकल्पांनी जवळपास तळ गाठला असल्यामुळे या प्रकल्पांवर अवलंबून असणाऱ्या लहान-मोठ्या गावांना सध्या पाणीटंचाईचा सामना करावा लागत आहे. विष्णुपुरी प्रकल्पामध्ये सध्या केवळ ७.१ टक्के पाणीसाठा शिल्लक आहे.

मोबाइल अॅप डाउनलोड करा आणि राहा अपडेट

धाक हवा, दहशत नको

September 3, 2015, 12:23 pm

≫ Next: उद्धव ठाकरेंचा दुष्काळी दौरा

≪ Previous: आली पाणीबाणी

$

0

0

विजय देऊळगावकर

पोलिस आयुक्तांच्या संकल्पनेतून शहरात चार्ली पथकाची निर्मिती करण्यात आली आहे. रस्त्यावरील गुन्हेगारी रोखण्याच्या प्रमुख हेतूने या पथकाची निर्मिती आयुक्तांनी केली. काही दिवसातच या पथकाने त्यांची धाक शहरात निर्माण केला. मात्र, काही जणांच्या अतिरेकीपणामुळे हा धाक आता दहशतीमध्ये बदलत आहे. ही चिंतेची बाब आहे.

पोलिस आयुक्त अमितेशकुमार यांनी पदभार घेण्यापूर्वी शहर पोलिस दलात पोलिस ठाणे अंर्तगत बीट मार्शल ही संकल्पना कार्यरत होती. बीट मार्शलला त्याचा भाग नेमून दिल्यानंतर त्या भागात गस्त घालण्याची जबाबदारी त्याची होती. मात्र, बीटमार्शलकडून प्रभावी कामगिरी दिसून येत नव्हती. ही बाब हेरून आयुक्त अमितेशकुमार यांनी चार्ली पथक ही अभिनव संकल्पना राबवली. १५० तरूण जवान निवडत त्यांनी पथक स्थापन केले. या सर्वांना केवळ रस्त्यावर पेट्रोलिंग करून स्ट्रीट क्राईम रोखणे व कायदा व सुव्यवस्था सांभाळणे ही कामे देण्यात आली. यांचे नियंत्रण पोलिस ठाण्याकडे न देता थेट गुन्हेशाखेकडे देण्यात आले. या चार्ली पथकाचा काही दिवसात शहरात प्रभाव दिसून आला. रस्त्यावरील गुन्हेगारीला काही प्रमाणात अंकूश बसला. थेट पोलिस आयुक्तांचे पथक असल्याने हे जवान जोरदार काम करीत होते. मात्र, यामध्ये देखील काहीजण अपवाद होते. आपल्याला दिलेली जबाबदारी त्यांना ओळखता आली नाही. यातून गैरप्रकार सुरू झाले. नुकताच भोईवाड्यात महिला चार्लीसोबत हाणामारीचा प्रकार घडला. त्यातून त्यांनी सुडापोटी एका रिक्षाचालकाला नाहक मारहाण केली. उलट त्याच्यावरच गुन्हा दाखल करण्यात आला. घटना घडली त्या ठिकाणी काही चॅनल्सचे रिपोर्टर तसेच प्रसार माध्यमांचे प्रतिनिधी देखील उपस्थित होते. पोलिसांची दडपशाही त्यांनी स्वतः पाहिली. या घटनेचे चित्रीकरण होऊन अवघ्या काही मिनीटात तो व्हिडिओ व्हॉटस्अॅपवर व्हायरल झाला. यामध्ये महिला कर्मचारी अश्लील शिवीगाळ करीत असताना तसेच मारहाण करताना दिसून येत होती. घडलेला हा प्रकार पोलिस दलातील अनेक वरिष्ठ अधिकाऱ्यांना देखील पटला नाही. खाजगीत बोलताना त्यांनी घडलेला प्रकार चुकीचा असल्याचे मान्य केले. मात्र, यांना समजावून सांगेल कोण हा प्रश्न त्यांनी निर्माण केला. समजावून सांगण्यास गेल्यास पोलिस आयुक्तांकडे खोट्या तक्रारी जाण्याची भिती या अधिकाऱ्यांना वाटते. चार्लींचा हा एकच प्रकार नाही. विदयार्थ्यांना रस्त्यावर उठबशा मारायला लावण्याचेही प्रकार घडले आहेत. लहान बालकांकडून वाहन चालवताना चूक होत असल्यास त्याला रस्त्यावर अपमानित करण्यापेक्षा त्याच्या पालकांना बोलावून रितसर जी काय कारवाई असेल ती करणे अपेक्षित आहे. शहरातील नागरिकांमध्ये, तरूण व बालकांमध्ये देखील पोलिस आयुक्त अमितेशकुमार यांची प्रतिमा सिंघमसारखी आहे. मात्र, चार्ली पथकांकडून जे काही प्रकार सुरू आहेत. त्यामुळे नागरिकांमध्ये चार्लीच्या वर्तनाबद्दल नाराजी आहे. पोलिसांचे काम शहरात निश्चितच चांगले सुरू आहे. याबद्दल काहीच शंका नाही. नागरिकांसाठी पोलिस आयुक्त अमितेशकुमार यांनी अनेक चांगले उपक्रम राबविले आहेत. एक चांगले कार्यक्षम अधिकारी शहराला भेटले आहेत. फक्त त्यांनी निर्माण केलेल्या चार्ली पथकाकडून होत असलेल्या अतिरेकीपणाबद्दल नागरिकांत रोष आहे. कोणत्याही चांगल्या कामाला नावे ठेवण्याची लोकांना सवय असते. मात्र, ज्या ठिकाणी खरच काही चूक होत असेल तर त्या ठिकाणी बोट ठेवणे देखील गैर नाही. चार्ली पथकातील या चार्लीनी देखील आपली जबाबदारी समजावून वागणे अपेक्षित आहे. पोलिस व जनतेमध्ये आयुक्त अमितेशकुमार यांनी सलोख्याचे वातावरण निर्माण केले आहे. त्याला चार्लींकडून तडा जायला नको. त्यामुळे चार्लींचा धाक हवा दहशत नको, असे नमूद करावे वाटते.

मोबाइल अॅप डाउनलोड करा आणि राहा अपडेट

---

उद्धव ठाकरेंचा दुष्काळी दौरा

September 3, 2015, 12:29 pm

≫ Next: ८६ कोटींच्या पीएफवर डल्ला

≪ Previous: धाक हवा, दहशत नको

$

0

0

औरंगाबाद : 'शिवसेना पक्षप्रमुख उद्धव ठाकरे ११ सप्टेंबरपासून मराठवाड्यातील दुष्काळाची पाहणी करण्यासाठी येणार आहेत,' अशी माहिती पालकमंत्री रामदास कदम यांनी दिली.

गुरुवारी पालकमंत्र्यांनी शिवसेनेच्या सर्व तालुकाप्रमुख तसेच इतर पदाधिकाऱ्यांची बैठक घेतली. यावेळी त्यांनी जिल्ह्यात वाढत असलेल्या शेतकरी आत्महत्या थांबवण्यासाठी तातडीच्या उपाययोजना राबवण्याबाबत चर्चा केली. जिल्ह्यातील शेतकऱ्यांमागे कर्जाचा तगादा सुरू असून रोजगाराच्या संधी उपलब्ध नाहीत. जनावरांना चारा नाही. या संदर्भात उपाययोजना राबवण्यात येणार असल्याचे कदम यांनी सांगितले. जिल्ह्यातील बाधित शेतकऱ्यांची संपूर्ण सर्वेक्षण करण्यात आले असून, त्याचा अहवाल येत्या काही दिवसात तयार होईल, असे कदम म्हणाले.

जलसाठ्यांतील पाणी पिण्यासाठीच ठेवावे लागेल. गरज पडल्यास बैठक घेऊन उद्योगाच्या पाणी कपातीबाबत निर्णय घेण्यात येईल, असे कदम म्हणाले.

मोबाइल अॅप डाउनलोड करा आणि राहा अपडेट

८६ कोटींच्या पीएफवर डल्ला

September 3, 2015, 12:41 pm

≫ Next: डोंगर भूमाफियांनी गिळला

≪ Previous: उद्धव ठाकरेंचा दुष्काळी दौरा

$

0

0

धनंजय कुलकर्णी । औरंगाबाद

२५ हजारांहून अधिक कर्मचाऱ्यांच्या हक्काच्या पैशांवर उद्योजक, शिक्षण संस्था, सहकारी साखर कारखान्यांनी डल्ला मारला आहे. त्यांनी तब्बल ८६ कोटी ६५ लाख २ हजार ३ कोटींचा पीएफ थकविला आहे. त्यामुळे कर्मचारी भविष्य निर्वाह निधी(पीएफ) कार्यालयाने १७ उद्योजक, ६ साखर कारखाने, ४ शैक्षणिक संस्था, ४ जीनिंग-प्रेसिंग मिल यांची बॅँक खाती गोठविली आहेत. त्याचबरोबर तीन साखर कारखान्यांच्या मालमत्तांना टाळे ठोकण्यात येणार आहे. कारवाईचा हा पहिला टप्पा असून, संबंधितांनी पीएफची रक्कम न भरल्यास मालमत्ता विकण्यात येणार आहेत.

१७ कारखाने व उद्योजक

श्रीहरी असोसिएट्स, औरंगाबाद ः १५ लाख ६४ हजार ४४५

टेलकॉम इंडस्टीज, वाळूज ः १५ लाख ३९ हजार २९४

रुफिट इंडस्टीज, चिकलठाणा ः १४ लाख ८९ हजार ४०९

भगवान जीनिंग अॅँड प्रेसिंग परळी वैजनाथ ः १२ लाख ७० हजार ४१५

हॉटेल रसोई, एन ६ सिडको, औरंगाबाद ः १२ लाख ६० हजार ४९४

अमर-अमित अॅलॉइज, जालना ः १२ लाख ५६ हजार २६२

महेंद्र रिरोलिंग, जालना ः १० लाख ७१ हजार ६१८

अन्नपूर्णा कोटेक्स, सिडको ः १६ लाख ४२ हजार ९०३

नाथ बायोजिन्स, औरंगाबाद ः १६ लाख ८५ हजार ८११

ऑटो कार्स, औरंगाबाद ः १७ लाख ८६ हजार ४५२

बाफना रिरोलिंग मिल्स, पैठण ः १९ लाख १५ हजार १७

मराठवाडा अॅक्सिडेंट अँड बर्न रिसर्च सेंटर, सुश्रुत हॉस्पिटल, बन्सीलालनगर, औरंगाबाद ः २६ लाख ८५ हजार ५२२

वीर गुर्जर अॅल्युमिनिअम, वाळूज ः २७ लाख ८२ हजार ८४

एस. आर. मिरखले (सरकारी कंत्राटदार) ः ३५ लाख ९२ हजार ५७६

गणेश जीनिंग अँड प्रेसिंग, बदनापूर ः ३७ लाख ३६ हजार १२५

सूरज विंडोर्स, वाळूज ः ५५ लाख ६४ हजार ९३८

करण अॅलॉइज, औरंगाबाद ः ७९ लाख २ हजार २६

शैक्षणिक संस्था

विवेकानंद शिक्षण संस्था, औरंगाबाद ः २० लाख ८५ हजार ५८१

इंदिरा गांधी उर्दू डी.एड. कॉलेज, नांदेड ः २४ लाख ७९ हजार १०

जे. एन. कॉलेज ऑफ सोशल वर्क, नांदेड ः २६ लाख २३ हजार ५६९

एमबीई सोसायटी कॉलेज ऑफ इंजिनीअरिंग, अंबाजोगाई ः ११ लाख ८२ हजार ३९

साखर कारखाने

सिद्धेश्वर साखर कारखाना, सिल्लोड ः १ कोटी ६६ लाख ७९९

कडा साखर कारखाना, आष्टी ः ५३ लाख ४९ हजार १४२

संत एकनाथ सहकारी साखर कारखाना ः ३६ लाख ३८ हजार ८५३

पद्मश्री विठ्ठलराव विखे - पाटील साखर कारखाना, बीड ः ३३ लाख ९६ हजार २९८

मुक्तेश्वर साखर कारखाना गंगापूर, औरंगाबाद ः २४ लाख १३ हजार ८

पद्मश्री विखे पाटील कारखाना, बीड ः २१ लाख ८५ हजार २७०

कारवाई करणे आवश्यकच होती. प्रॉपर्टी अॅटॅच करणे आणि बँकखाती गोठविणे अशी कारवाई केली आहे. तरीही त्यांनी पीएफ रक्कम भरली नाही तर, खात्याच्या नियमानुसार प्रॉपर्टी विकावी लागेल.- सुधीर गणवीर, आयुक्त, पीएफ कार्यालय.

मोबाइल अॅप डाउनलोड करा आणि राहा अपडेट

डोंगर भूमाफियांनी गिळला

September 3, 2015, 12:33 pm

≫ Next: मुख्यमंत्र्यांना बसल्या दुष्काळझळा

≪ Previous: ८६ कोटींच्या पीएफवर डल्ला

$

0

0

औरंगाबाद ः जमिनीला सोन्याचा भाव येताच साताऱ्यातला डोंगर भूमाफियांना गिळला. अगदी माथ्यावर डोंगराची कापाकापी करून, अनधिकृत वसाहती उभारल्या. पायथ्याशी चहूबाजुने घरे उभी राहिल्याने डोंगराची 'पर्वती' झाली आहे. घरांच्या गर्दीत डोंगराचे मूळ अस्तित्वच धोक्यात आले आहे. विशेष म्हणजे या अवैध बांधकामांना महापालिका, वन विभाग व महसूल विभागाच्या दुर्लक्षामुळे अभय मिळाले आहे.

औरंगाबाद शहराच्या विस्तारात जमिनीचे भाव गगनाला भिडले आहेत. घर बांधणे सामान्यांच्या आवाक्याबाहेर गेले आहे. या परिस्थितीत अनधिकृत वसाहती वाढत असून शहरालगतचे डोंगरपायथे अतिक्रमणांनी वेढले आहेत. शहरात सातारा-देवळाईचा समावेश होताच गायरान जमिनी व डोंगरालगत बांधकामे वाढत आहेत. काही वर्षांपर्यंत साताऱ्याच्या डोंगराखाली मूळ गावाशिवाय दुसरी वसाहत नव्हती. मागील पाच वर्षात डोंगर उतारावर आडव्या-तिडव्या वस्त्या झाल्या आहेत.

डोंगराला चहुबाजूने घरांचा वेढा पडला आहे. त्यामुळे डोंगरावर जाण्यासाठी पर्यटक व भाविकांना रस्ता सापडत नाही. शहराजवळ कमी पैशात घर घेण्याच्या प्रकारातून वस्ती वाढत आहे. गायरानात अनेक वर्षांपासून भटक्या जमातीची वस्ती आहे, पण आता स्थलांतरितांची घरे वाढली आहेत. धार्मिकस्थळे व कच्च्या घरांनी साताऱ्याचा डोंगर वेढला आहे. या डोंगरानंतर वन विभागाची हद्द आहे. डोंगर व गायरान जमीन महसूल विभागाच्या अखत्यारित आहे. तर सातारा गाव महापालिकेत आल्यामुळे मनपाची हद्द विस्तारली आहे. मात्र, या तीन विभागांनी अतिक्रमणांकडे कानाडोळा केला आहे. पहाडसिंगपुरा येथील अवैध घरे नुकतीच ताब्यात घेण्यात आली. साताऱ्यात कारवाई झाल्यास शेकडो कुटुंब रस्त्यावर येण्याची शक्यता आहे. सध्या डोंगरांचे अस्तित्व टिकवणे व अवैध बांधकामे रोखण्यासाठी कारवाईची गरज आहे.

.......

शहर परिसरातील डोंगररांगा सुरक्षित ठेवण्यासाठी दहा वर्षांपूर्वी सामाजिक कार्यकर्ते प्रा. विजय दिवाण यांनी महापालिकेला एकात्मिक कार्यक्रमाचा प्रस्ताव दिला होता. पर्जन्यमान वाढवण्यासाठी सातारा डोंगररांगांवर झाडे वाढवणे व सुरक्षेसाठी कुंपण (फेन्सिंग) घालण्याचा हा प्रस्ताव होता. महापालिका, सामाजिक वनीकरण, वन विभाग, महसूल प्रशासन व स्वयंसेवी संस्थांच्या सहकार्यातून कार्यक्रम राबविणे अपेक्षित होते. मात्र, मनपाने प्रस्तावाला केराची टोपली दाखवली. परिणामी, दहा वर्षांत सातारा डोंगर अनधिकृत वस्त्यांनी गिळला.

..........

पुण्यातील 'पर्वती' डोंगराप्रमाणे सातारा डोंगराला झोपडपट्ट्यांनी विळखा घातला आहे. ही वसाहत स्थानिक नेत्यांचे अभय असल्यानेच उभी राहिली असे ग्रामस्थांनी सांगितले. विशेष म्हणजे काही गल्ल्यांमध्ये नेत्यांच्या नावाचे फलक आहेत. डोंगराजवळ घर बांधण्यासाठी प्रशासकीय अधिकारी, दलाल व स्थानिक नेत्यांशी संबंधित व्यक्तीचा तोंडी 'व्यवहार' होत असल्याची चर्चा आहे.

..........

साताऱ्यात ग्रामपंचायत अस्तित्वात असतानाच वस्ती उभी राहिली आहे. ही वस्ती अधिकृत की अनधिकृत याबाबत महापालिकेला माहिती नाही.-सी. एम. अभंग, वॉर्ड अधिकारी, मनपा

सातारा परिसर आता महापालिकेच्या हद्दीत आहे. अनधिकृत घरांबाबत आमच्याकडे तक्रारी आल्या आहेत. या तक्रारींबाबत मनपाला पत्र दिले आहे. मनपाने कारवाई करणे अपेक्षित आहे. - रमेश मुनलोड, तहसीलदार

वन विभागाची हद्द अनधिकृत वस्ती असलेल्या डोंगरानंतर सुरू होते. सातारा डोंगर व गायरान जमीन महसूल प्रशासनाच्या ताब्यात आहे. - आर. ए. नागापूरकर, वनपरिक्षेत्र अधिकारी

मोबाइल अॅप डाउनलोड करा आणि राहा अपडेट

मुख्यमंत्र्यांना बसल्या दुष्काळझळा

September 3, 2015, 11:31 am

≫ Next: शेतीच्या वादातून महिलेचा खून

≪ Previous: डोंगर भूमाफियांनी गिळला

$

0

0

म. टा. प्रतिनिधी, औरंगाबाद

दुष्काळी मराठवाड्याच्या दौऱ्यावर असलेल्या मुख्यमंत्री देवेंद्र फडणवीस यांना गुरुवारी परभणी जिल्ह्यात दुष्काळझळा सोसाव्या लागल्या. ढोलगावात शेतकऱ्यांनी मुख्यमंत्र्यांसमोरच संतप्त पवित्रा घेत, संपूर्ण कर्जमाफीची मागणी करीत गोंधळ घातला. तर सिंगणापूर फाटा येथे मुख्यमंत्र्यांना अडवण्यासाठी शेतकऱ्यांनी 'रास्ता रोको' केला. पण पोलिसांनी हा उद्रेक लाठीच्या बळावर मोडून काढला.

मराठवाड्यातील दुष्काळाच्या पाहणीसाठी मुख्यमंत्री फडणवीस तीन दिवसांपासून दौऱ्यावर आहेत. परभणी जिल्ह्यातील गुरुवारच्या दौऱ्यादरम्यान शेतकऱ्यांच्या संयमाचा बांध फुटला. हातचे पीक गेलेल्या शेतकऱ्यांनी मुख्यमंत्र्यांकडे कर्जमाफीची मागणी केली. ढालेगाव येथे मुख्यमंत्री शेतकऱ्यांशी संवाद साधणार होते. त्यावेळी त्यांच्यासमवेत पालकमंत्री दिवाकर रावते, पाणीपुरवठामंत्री बबनराव लोणीकर, खासदार संजय जाधव यांच्यासह काही आमदारही होते. मुख्यमंत्र्यांसमोरच शेतकऱ्यांनी कर्जमाफीचा पुकारा केला व मुख्यमंत्र्यांनी स्वतः निवेदने स्वीकारावीत, अशी मागणी लावून धरल्याने गोंधळ झाला.

सिंगणापूर फाटा येथे रास्ता रोको आंदोलन करण्यासाठी माकप आणि किसान सभेचे कार्यकर्ते जमले होते. मुख्यमंत्र्यांच्या ताफा या रस्त्यावर येण्यापूर्वीच पोलिसांनी कार्यकर्त्यांना हटविण्याचा प्रयत्न केला असता, जोरदार दगडफेक झाली. त्यात एका महिला पोलिसासह तीन पोलिस कर्मचारी जखमी झाले, तर पोलिसांच्या पाच वाहनांचे नुकसान झाले. पोलिसांनी लाठीमार करून ४० कार्यकर्त्यांना ताब्यात घेतले व हा आक्रोश थांबवण्याचा प्रयत्न केला.

आत्महत्या सुरुच!

उपासमारीला कंटाळून २९ ऑगस्टला पेटवून घेतलेल्या मनीषा गटकळ यांचा गुरुवारी सोलापूर येथील हॉस्पिटलमध्ये मृत्यू झाला. नऊ माणसांच्या कुटुंबांना खाण्यास भाकरीचा तुकडाही नसल्याने त्यांनी अंगावर रॉकेल टाकून जाळून घेतले होते. दरम्यान, नापिकी, कर्जबाजारीपणा व उपासमारीला कंटाळून उस्मानाबाद जिल्ह्यातील दोन शेतकऱ्यांनीही गुरुवारी जीवन संपवले. मुख्यमंत्र्यांच्या उस्मानाबादमधील दुष्काळी दौऱ्यानंतर काही तासांतच हा प्रकार घडला. पाटसांगवी (ता. भूम) येथील लक्ष्मण भाऊराव पाटील यांनी बुधवारी रात्री उशिरा गळफास घेऊन, तर उस्मानाबादच्याच करजखेडा येथील शेतकरी योगेश विलास चव्हाण (१९) यांनीही स्वत:ला संपवत आत्महत्या केली. जिल्ह्यात आतापर्यंत १०५ शेतकऱ्यांनी आत्महत्या केल्या आहेत.

मोबाइल अॅप डाउनलोड करा आणि राहा अपडेट

शेतीच्या वादातून महिलेचा खून

September 4, 2015, 11:57 am

≫ Next: रिकाम्या खुर्च्यांना पालिकेत हार

≪ Previous: मुख्यमंत्र्यांना बसल्या दुष्काळझळा

$

0

0

जालनाः शेतात जाणाऱ्या रस्त्याच्या वादातून भावकीतीलच महिलेचा कुऱ्हाडीने घाव घालून खून केला. ही घटना तालुक्यातील बरंजळा लोखंडे शिवारात रात्री नऊच्या सुमारास घडली. या प्रकरणी सात जणांविरुद्ध गुन्हा दाखल करण्यात आला.

रमेश लोखंडे व श्रीमंत लोखंडे यांच्यात शेतातील रस्त्यावरून वाद चालू आहे. या वादातून गणेश लोखंडे जखमी व त्याची पत्नी मिराबाई लोखंडे (वय २५) हे दोघे बैलगाडीतून घराकडे येत असताना श्रीमंत लोखंडे, निवृत्ती लोखंडे, मंगल लोखंडे, नारायण लोखंडे, आशा लोखंडे, वंदना लोखंडे, कलाबाई लोखंडे, यांनी कुऱ्हाडीने व दगडाने मारहाण केली. यामध्ये मीराबाईचा मृत्यू झाला. गणेश लोखंडे हा गंभीर जखमी झाला. या प्रकरणी रमेश लोखंडे यांच्या फिर्यादीवरुन वरील सर्व आरोपींविरुद्ध भोकरदन पोलीस ठाण्यात गुन्हा दाखल करण्यात आला आहे.

मोबाइल अॅप डाउनलोड करा आणि राहा अपडेट

रिकाम्या खुर्च्यांना पालिकेत हार

September 4, 2015, 11:59 am

≫ Next: ‘शेतकऱ्यांनो, निराश होऊ नका’

≪ Previous: शेतीच्या वादातून महिलेचा खून

$

0

0

लातूरः महापालिकेच्या अनागोंदी कारभाराविरुद्ध राष्ट्रवादी काँग्रेसच्या नगरसेवकांनी शुक्रवारी आक्रमक पावित्रा घेतला. महापौर अख्तर शेख आणि आयुक्त सुधाकर तेलंग यांच्या दालनातील रिकाम्या खुर्चीला पुष्पहार घालून निषेध नोंदवला.

पालिकेकडे विविध विकास कामांसाठी २८ कोटी रुपये निधी शासनाकडून जमा झाला आहेत. त्या निधीचा विनियोग करावा, पाणी पुरवठ्यासाठी नियोजन करावे या मागण्यासाठी राष्ट्रवादी काँग्रेसचे नगरसेवक महापौर आणि आयुक्तांना भेटण्यासाठी गेली चार दिवस प्रयत्न करीत होते. परंतु, त्यांची भेट होत नव्हती. महापौरसह एक ही वरिष्ठ अधिकारी उपस्थित नसल्यामुळे अधिकारी आणि पदाधिकारी यांच्या रिकाम्या खुर्च्यांना पुष्पहार घालून निवेदन तिथे ठेवले आहे. प्रशासनाने कारवाई न केल्यास आंदोलनाचा इशारा विरोधी पक्षनेते मकरंद सावे यांनी दिला.

मोबाइल अॅप डाउनलोड करा आणि राहा अपडेट

‘शेतकऱ्यांनो, निराश होऊ नका’

September 4, 2015, 12:02 pm

≫ Next: पाणी स्रोतांची वैजापूरला पाहणी

≪ Previous: रिकाम्या खुर्च्यांना पालिकेत हार

$

0

0

म. टा. प्रतिनिधी, नांदेड

प्रसंग कठीण आहे, पण निराश होऊ नका. एकमेकाच्या हातात-हात घेऊन यावर मात करू. राज्य सरकार दुष्काळाच्याबाबतीत पूर्ण संवेदनशील आहे. पाणी, चारा आणि हाताला काम देण्यासाठी कटिबद्ध आहे, अशा शब्दात मुख्यमंत्री देवेंद्र फडणवीस यांनी शेतकऱ्यांना दिलासा दिला.

लोहा तालुक्यातील आंबेसांगवी येथील नाला खोलीकरणाच्या प्रकल्पस्थळी आयोजित कार्यक्रमात ते बोलत होते. यावेळी पालकमंत्री दिवाकर रावते, पाणी पुरवठा व स्वच्छता मंत्री बबनराव लोणीकर, परभणीचे खासदार संजय जाधव, आमदार प्रताप पाटील-चिखलीकर, हेमंत पाटील, सुभाष साबणे, नागेश पाटील आष्टीकर, तुषार राठोड आदींची उपस्थिती होती.

याप्रसंगी मुख्यमंत्री म्हणाले, 'मराठवाड्यात सातत्याने शेतकऱ्यांना आपत्तीचा सामना करावा लागला आहे. केलेल्या पेरण्याही वाया गेल्या आहेत. तर काहींना पेराच करता आलेला नाही. मराठवाड्यातील ७० टक्के पीक खराब झालेले आहे. त्यामुळे अशा संकटाच्या समयी शेतकऱ्यांच्या पाठीशी ठाम उभे राहण्याचे निर्णय सरकारने घेतले आहेत. यापुढेही दीर्घकालीन उपाय योजना करता याव्यात यासाठी हा दौरा करतो आहोत. त्यासाठी शासन आणि प्रशासन घेऊन मराठवाड्यात उतरलो आहोत. प्रत्यक्ष परिस्थिती पाहत आहोत. शेतकऱ्यांशी संवाद साधत आहोत. पिण्याचे पाणी, जनावारांसाठीचे पाणी आणि चारा यासह शेतकऱ्यांना आणि शेतमजुरांनाही हाताला काम मिळेल असे नियोजन करत आहोत.'

चारा छावण्या, अन्य सुरक्षा योजना, रोहयो या सारख्या योजनातून अटींचे निर्बंध शिथील करून शेतकऱ्यांना दिलासा देण्याचा प्रयत्न असल्याचे नमूद करुन मुख्यमंत्री फडणवीस म्हणाले की, टंचाईच्या उपाय योजनांसाठी टंचाईग्रस्त जिल्ह्यांना दोन दिवसांपूर्वीच ८८ कोटी रुपये देण्यात आले आहेत. वैरण विकास कार्यक्रमाला गती देण्यात आली आहे. 'शेत तेथे शेततळे' असे धोरण घेऊन शेतकरी आणि शेतमजुरालाही काम देण्याचा प्रयत्न असेल.

'भेटून दिलासा देण्याचा प्रयत्न'

केवळ चर्चेतून किंवा मंत्रालयातूनच दुष्काळावरील उपाय योजना करण्यापेक्षा प्रत्यक्ष ज्या शेतकऱ्यांना भोगावे लागते त्यांच्यामध्ये जावून, त्यांच्याशी संवाद साधून निर्णय घेण्याचा सरकारचा प्रयत्न आहे. यावर्षी टंचाईची तीव्रता भीषण आहे. त्यासाठी शेतकऱ्यांना भेटून त्यांना दिलासा देण्याचाही प्रयत्न केला जात असल्याचे पालकमंत्री रावते यांनी सांगितले.

मोबाइल अॅप डाउनलोड करा आणि राहा अपडेट

---

पाणी स्रोतांची वैजापूरला पाहणी

September 4, 2015, 12:03 pm

≫ Next: १६ ग्रामपंचायतींना सव्वाकोटीचा निधी

≪ Previous: ‘शेतकऱ्यांनो, निराश होऊ नका’

$

0

0

वैजापूरः वैजापूर ग्रामपंचायत दोनमध्ये निर्माण झालेल्या पाणीटंचाईच्या पार्श्वभूमीवर गटविकास अधिकारी प्रशांत शिर्के यांच्या पथकाने गुरुवारी (३ सप्टेंबर) गावातील जलस्त्रोतांची पाहणी केली.

गावातील सर्व जलस्त्रोत कोरडे पडल्याने दोन दिवसात टँकर सुरू करण्यात येईल, असे आश्वासन या पथकाने गावकऱ्यांना दिले. गेल्या काही दिवसांपासून या ग्रामपंचायतीमध्ये पिण्याच्या पाण्याची टंचाई भासत असल्याने जनावरांनाही पाणी मिळणे कठीण झाले आहे. युवक काँग्रेसचे तालुकाध्यक्ष उमेश नाईकवाडी यांच्या नेतृत्वाखाली कार्यकर्त्यांनी दोन दिवसांपूर्वी गटविकास अधिकाऱ्यांना घेराव घातला होता. त्यानंतर गटविकास अधिकारी शिर्के, ग्रामसेवक मेहेत्रे, दिवेकर यांनी गावात जाऊन पाहणी केली. यावेळी उमेश नाईकवाडी, बाबासाहेब वाणी, नितीन शेळके,गोरख गावडे, संतोष नाईकवाडी आदी उपस्थित होते.

मोबाइल अॅप डाउनलोड करा आणि राहा अपडेट

१६ ग्रामपंचायतींना सव्वाकोटीचा निधी

September 4, 2015, 12:05 pm

≫ Next: शेतकऱ्याने पकडला बैलासह चोर

≪ Previous: पाणी स्रोतांची वैजापूरला पाहणी

$

0

0

वैजापूर: तालुक्यातील १६ ग्रामपंचायतींना जिल्हा वार्षिक योजनेअंतर्गत ग्रामविकास जनसुविधेच्या विविध विकास कामांकरिता एक कोटी २० लाख रुपयांचा निधी मंजूर झाला आहे. या कामांना प्रशासकीय मान्यता मिळाल्यामुळे तालुक्यातील सात ग्रामपंचायतींना नवीन इमारतींसाठी प्रत्येकी बारा लाख रुपये, दोन ग्रामपंचायतींना स्मशानभूमीसाठी प्रत्येकी चार लाख रुपये व सात ग्रामपंचायतींना स्मशानभूमी शेड व सुशोभीकरणासाठी प्रत्येकी चार लाख रुपयांचा निधी मिळणार आहे, अशी माहिती शिवसेनेचे माजी आमदार आर. एम. वाणी यांनी प्रसिद्धीपत्रकाद्वारे दिली आहे. या योजनेअंतर्गत तालुक्यातील चिंचडगाव, जरूळ, रोटेगाव, माळीसागज, बोरसर, नालेगाव व लाडगाव या ग्रामपंचायतींच्या नवीन इमारतीचे बांधकाम करण्यात येईल. या योजनेअंतर्गत जिल्ह्यातील १६० ग्रामपंचायतींसाठी ६ कोटी ८४ लाख रुपयांचा निधी मंजूर झाल्याचे प्रसिद्धीपत्रकात म्हटले आहे.

मोबाइल अॅप डाउनलोड करा आणि राहा अपडेट

शेतकऱ्याने पकडला बैलासह चोर

September 4, 2015, 12:06 pm

≫ Next: दुष्काळाच्या झळांनी शेतकरी त्रस्त

≪ Previous: १६ ग्रामपंचायतींना सव्वाकोटीचा निधी

$

0

0

खुलताबाद: तालुक्यातील तिसगाव येथील शेतकरी रवींद्र दत्तात्रय मोरे या शेतकऱ्याने शेतातून चोरीला गेलेला बैल चोरट्यासह पकडून पोलिसांच्या ताब्यात दिला. बबन गंगाराम खडके (रा. निरगुडी ता. खुलताबाद) असे या चोरट्याचे नाव आहे. बैलजोड्या चोरून विकण्याचा प्रयत्नात असलेल्या चोरट्याने परिसरातून बैलजोड्या चोरल्याची कबुली दिली आहे.

तिसगाव येथील शेतकरी रवींद्र मोरे यांनी ३१ ऑगस्ट रोजी रात्री एक बैल चोरीस गेला. एक व्यक्ती तीस हजाराचा एक बैल नऊ हजार रुपयांमध्ये विक्रीसाठी घेऊन आल्याचे रवींद्र मोरे यांना मनूर खिर्डी येथील तंटामुक्त गाव समितीच्या पदाधिकाऱ्यांनी कळविले. मोरे यांनी तिसगाव तंटामुक्त गाव समितीचे अध्यक्ष श्याम गोल्हार यांच्यासह जाऊन चोराला पकडून पोलिसांच्या ताब्यात दिले.

मोबाइल अॅप डाउनलोड करा आणि राहा अपडेट

दुष्काळाच्या झळांनी शेतकरी त्रस्त

September 4, 2015, 12:07 pm

≫ Next: सव्वासात लाखांच्या मालाची ट्रकमधून चोरी

≪ Previous: शेतकऱ्याने पकडला बैलासह चोर

$

0

0

म. टा. प्रतिनिधी, खुलताबाद

तालुक्यात दुष्काळाच्या झळा बसत असून शेतीत काम नाही. परिणामी बाजारपेठेत शुकशुकाट जाणवत आहे. यावर्षीची अवस्था पाहून शेतकरी व शेतमजूर चिंताग्रस्त आहेत.

यावर्षी अत्यल्प पाऊस पडला आहे. अधूनमधून पडणाऱ्या पावसामुळे शेती हिरवीगार दिसते; मात्र उत्पादन येण्याची शक्यता नाही. सोयाबीनला शेंगा लगडल्या नाही, तूरळक ठिकाणी बारीक शेंगा लागल्या आहेत. उडीद, मूग, तूर नाममात्र आहे. पावसाअभावी मका, कापसाची वाढ खुंटली आहे. काही ठिकाणी मक्याची बारीक कणसे आहेत. कपाशीला कैऱ्याच लागल्या नाहीत. लागलेल्या कैऱ्या गळत आहेत. एकूणच शेतातील कोमेजून जात असलेले पिके पाहून कर्जबाजारी शेतकरी चिंताग्रस्त आहे. यावर्षी जून महिन्यात पावसाने हजेरी लावल्याने शेतकऱ्यांनी उत्साहात पेरणी केली. शेती मशागत, बियाणे, औषधे, खत, फवारणी यावरील खर्च वाया गेला आहे. पुढील दिवस कसे काढायचे या चिंतेने शेतकऱ्यांना ग्रासले आहे. पीककर्ज, विहीर, पाईपलाइन, विद्युत पंपासाठी घेतलेल्या कर्जाच्या वसुलीसाठी बँकाचा तगादा सुरू असल्याने शेतकरी मेटाकुटीला आले आहेत.

शेतकऱ्यांना वीज बिल कसे भरायचे, मुलांच्या शिक्षणाचा खर्च कसा भागवायचा, मुलींच्या लग्नाच्या खर्चाचे कसे करायचे, असे प्रश्न सतावत आहेत. सर्वच राजकीय पक्षाकडून दुष्काळ निवारणासाठी प्रत्यक्षात प्रयत्न होण्याऐवजी राजकारण केले जात असल्याची शेतकऱ्यांची भावना आहे. पिण्याचे पाणी, जनावरांना चारा, मजुरांना काम मिळण्यासाठी नियोजनाची गरज आहे. शासनाने पीककर्ज, वीज बिल, शैक्षणिक शुल्कमाफी द्यावी, रोजगार उपलब्ध करून द्यावा अशी अपेक्षा शेतकरी करीत आहेत.

भीषण पाणीटंचाईचे संकट

गिरिजा मध्यम प्रकल्प, सोबलगाव मध्यम प्रकल्प तसेच तालुक्यातील लहानमोठे पाझर तलाव, विहिरी कोरड्या पडल्या आहेत. ज्या विहिरींना थोडेबहुत पाणी आहे तेही कडक उन्हामुळे झपाट्याने कमी होत आहे. खुलताबाद शहरासह तालुक्यातील ७६ गावांमध्ये भीषण पाणीटंचाईचे संकट आ वासून उभे आहे.

मोबाइल अॅप डाउनलोड करा आणि राहा अपडेट

सव्वासात लाखांच्या मालाची ट्रकमधून चोरी

September 4, 2015, 12:08 pm

≫ Next: महामार्ग नव्हे मृत्यूमार्ग

≪ Previous: दुष्काळाच्या झळांनी शेतकरी त्रस्त

$

0

0

कन्नड : औरंगाबाद-धुळे राष्ट्रीय महामार्गावरी पाणपोई फाट्यानजिक ढाब्यावर थांबलेल्या एका ट्रकमधून सुमारे सव्वासात लाख रुपये किंमतीच्या प्लॅस्टिक ग्रॅनुल्सच्या बॅगा लंपास करण्यात आल्या. या प्रकरणी कन्नड पोलिस ठाण्यात गुन्हा दाखल करण्यात आला आहे.

कन्नडकडून औरंगाबादकडे जाणारा ट्रक (एम एच १८, ई ई २७१) गुरुवारी रात्री (३ सप्टेंबर) पाणपोई फाट्यानजिकच्या शिवशक्ती ढाब्यावर मुक्कामासाठी थांबला होता. या ट्रकमधील प्रत्येकी २५ किलो वजनाच्या प्लॅस्टिक ग्रॅनुल्सच्या २९५ बॅगा चोरांनी लंपास केल्या. या एका बॅगेची किंमत २,४५४ रुपये असून चोरीस गेलेल्या मालाची एकूण किंमत ७ लाख २३ हजार ९३० रुपये आहे. ही घटना गुरुवारी रात्री दहा ते शुक्रवारी सकाळी सहाच्या दरम्यान घडली. ट्रकचा क्लिनर रोहित मुखर्जी शुक्रवारी (४ सप्टेंबर) सकाळी सहा वाजता झोपेतून उठला असता ट्रकची ताडपत्री फाडून लाल व हिरव्या रंगाची ताडपत्री असलेल्या ट्रकमध्ये माल भरला जात असल्याचे दिसले. ट्रकचालक व क्लिनरने आरडाओरडा करत त्या ट्रकमधील चोरांशी झटापट केली; मात्र चोर माल भरलेला ट्रक घेऊन जाण्यात यशस्वी झाले. ट्रकचालक अनिल नाना सोनवणे (रा. तवीरा ता. पारोळा जि.जळगाव) यांच्या फिर्यादीवरून अज्ञात व्यक्तीविरुद्ध कन्नड पोलिस ठाण्यात गुन्हा दाखल करण्यात आला आहे. या घटनेचा तपास पोलिस निरीक्षक सुभाष भुजंग यांच्या मार्गदर्शनाखाली बीट जमादार ए. एस. तुपे करत आहेत.

मोबाइल अॅप डाउनलोड करा आणि राहा अपडेट