महाविद्यालयीन तरुणाचे अपहरण करून सुटकेसाठी २५ हजार खंडणी मागणाऱ्या सहा जणांना पोलिसांनी दोन तासांत जेरबंद केले. हा प्रकार भाग्यनगर भागात घडला. तरुणाला मेसेज पाठविल्यामुळे या तरुणाचे अपहरण करण्यात आले. त्याला खोलीत डांबून मारहाण करण्यात आली व मारहाणीचे व्हिडिओ शुटिंगही केले.
भाऊसाहेब कौतिक शेळके (वय २१, रा. म्हाडा कॉलनी, बन्सीलालनगर, मूळ रा. औरंगपूर, ता. पैठण) हा एका महाविद्यालयात 'बीसीए'च्या तृतीय वर्षात शिक्षण घेतो. मंगळवारी सायंकाळी त्याच्या खोलीवर चार तरुण आले. त्यांनी शेळकेला भाग्यनगर येथे एका खोलीवर नेले. तेथे तीन तरुण होते. या आरोपींनी, 'तू कॉलेजमधील मुलीला मेसेज का पाठवला,' असे म्हणत बेदम मारहाण करून त्याला खंडणी मागितली. काही वेळाने त्याला सोडून दिले. त्यानंतर शेळके याने क्रांतिचौक पोलिसांना हा प्रकार सांगितला. त्यांनी दोन तासांत आरोपी तुषार राहणे, किरण थोटे, संदीप कुटे, ओम घेवारे, गोपाळ इंगळे, रणजीत तुपेसह एका सतरा वर्षांच्या आरोपीला अटक केली. आरोपींविरुद्ध दरोडा, खंडणी, अपहरण, डांबून ठेवणे, शिवीगाळ व धमकी दिल्याप्रकरणी गुन्हा दाखल केला.
मोबाइल अॅप डाउनलोड करा आणि राहा अपडेट