लग्नाचे आमीष दाखवून वीस वर्षीय युवतीवर बलात्कार करणारा व गर्भपात करण्यास करण्यास भाग पाडणारा मुख्य संशयित आरोपी अटकेत आहे. या प्रकरणात त्याच्या भावाचा नियमित जामीन आणि आई व गर्भपात करणाऱ्या डॉक्टरचा अटकपूर्व जामीन विशेष न्यायाधीश यू. एल. तेलगावकर यांनी फेटाळला.
नवजीवन कॉलनी परिसरातील युवतीच्या फिर्यादीनुसार बेगमपुरा पोलिस ठाण्यात गुन्हा दाखल करण्यात आला आहे. अजय मोकळे याने विवाहाचे आमीष दाखवून तिच्यावर २८ डिसेंबर २०१४ रोजी बलात्कार केला. युवतीला दिवस गेल्यानंतर अजयने पुन्हा विवाहाचे आमीष दाखवून गर्भपात करण्यास भाग पाडले. युवतीने गर्भपात केल्यानंतर विवाहास नकार दिल्याने २१ ऑगस्ट २०१५ रोजी बेगमपुरा पोलिस ठाण्यात फिर्याद दिली. त्यावरून अजय, त्याचा भाऊ मुकेश, दोघांची आई लताबाई मोकळे व डॉ. अमोल गाडेकर यांच्याविरुद्ध गुन्हा दाखल करण्यात आला. सद्यस्थितीत अजय व मुकेश दोघेही न्यायालयीन कोठडीत असून, मुकेश याने नियमित जामिनासाठी केलेला अर्ज फेटाळण्यात आला. तसेच लताबाई मोकळे व डॉ. अमोल गाडेकर यांनी अटकपूर्व जामिनासाठी केलेला अर्जही फेटाळण्यात आला.
न्यायालयीन कोठडी
औरंगाबादः १४३ बगळ्यांच्या मृत्यू आणि ६० पेक्षा जास्त बगळ्यांची अंडी फुटण्यास कारणीभूत ठरलेल्या तिघा संशयित आरोपींना शुक्रवारी न्यायालयीन कोठडीत ठेवण्याचे आदेश प्रथम वर्ग न्यायदंडाधिकारी जे. व्ही. पेखले-पूरकर यांनी दिले. या प्रकरणातील रेल्वेचा एक कर्मचारी पसार आहे.
याप्रकरणी शेख इद्रीस उर्फ मियाभाई, शेख अब्दुल गनी, मोहम्मद नईम व रेल्वे विभागाचा कर्मचारी के. बापूराव यांच्याविरुद्ध गुन्हा दाखल करण्यात आला. यातील रेल्वेचा कर्मचारी व आरोपी के. बापूराव पसार आहे. १८ सप्टेंबर रोजी पोलिस कोठडीची मुदत संपली.
भरपाई देण्याचे आदेश
औरंगाबादः दुचाकी व कारच्या अपघातातील मृत पोलिस उपनिरीक्षक ओमप्रकाश पोकलवार यांच्या वारसांना कार मालकाने २८ लाख ४ हजार १० रुपये नुकसान भरपाई देण्याचे आदेश प्रधान जिल्हा व सत्र न्यायाधीश तथा मोटार अपघात प्राधिकरणचे अध्यक्ष एस. एम. कोल्हे यांनी दिले.
२९ एप्रिल २००९ रोजी पोलिस उपनिरीक्षक ओमप्रकाश रामचंद्र पोकलवार हे औरंगाबाद-नगर रस्त्यावरून दुचाकीवरून जात असताना भरधाव वेगात येणाऱ्या कारने (एमएच २०, एए १८४२) त्यांच्या दुचाकीला धडक दिली. या अपघातात पोकलवार हे गंभीर जखमी झाले. उपचार सुरू असताना १३ मे २००९ रोजी त्यांचा मृत्यू झाला. पोकलवार यांच्या वारसांनी दावा दाखल केला. सुनावणीदरम्यान प्राधिकरणाने दोन्ही बाजूंच्या युक्तीवादानंतर,मृताच्या वारसास २८ लाख ४ हजार १० रुपये नुकसान भरपाई देण्याचे आदेश दिले.
मोबाइल अॅप डाउनलोड करा आणि राहा अपडेट
