उद्योगनगरीसाठी एक खूशखबर. आता औरंगाबादमधून जेट एअरवेजनेही आंतरराष्ट्रीय कार्गो सेवा सुरू करण्याचा निर्णय घेतला आहे. या निर्णयाने १०० पेक्षा जास्त देशांत आपला माल निर्यात करणे, मालाची आयात करण्याची संधी उद्योजकांना उपलब्ध होईल. एअर इंडियाने यापूर्वीच औरंगाबादमधून कार्गो सेवा सुरू करण्याचा निर्णय घेतला आहे. त्यामुळे औरंगाबाद आंतरराष्ट्रीय विमानतळावर लवकरच कार्गो हब तयार केले जाईल. कार्गोत कस्टमची सुविधा उपलब्ध असेल. आंतरराष्ट्रीय कार्गो सेवा सुरू झाल्यानंतर औरंगाबादमधून निर्यात होणारा माल थेट विदेशात पाठवायची संधी उपलब्ध होईल. जेट एअरवेजच्या औरंगाबाद मुंबई विमानातून सध्या अडीच टन मालाची वाहतूक केली जाते. या मालात निम्म्यापेक्षा अधिक माल हा देशांतर्गत वाहतुकीसाठी असतो. यामुळे शहरातील उदयोजकांना तसेच शेतीमाल उत्पादन करणाऱ्या शेतकऱ्यांसाठी जेट एअरवेजची सुविधा उपयोगी पडणार आहे.
इत्तेहाद एअरवेज माध्यम
औरंगाबाद ते मुंबई जेट एअरवेजचे विमान सकाळी आणि सायंकाळी अशा दोन वेळेस आहे. औरंगाबादहून मुंबईमार्गे इत्तेहाद एअरवेजच्या माध्यमातून परदेशात औरंगाबाद विमानतळावर बूक केलेल्या मालाची वाहतूक केली जाणार आहे.
औरंगाबादमधून मोठया प्रमाणात माल निर्यात होतो. विदेशातूनही मोठ्या प्रमाणात आयात होते. यामुळे जेट इंटरनॅशनल कार्गो सुविधा उपयोगी पडेल. लवकरच ही सेवा सुरू होईल. - अहेमद जलील, व्यवस्थापक, जेट एअरवेज
मोबाइल अॅप डाउनलोड करा आणि राहा अपडेट