म. टा. प्रतिनिधी, जालना
मराठवाड्यातील शेती उत्पादने आणि उद्योगांना विश्वाचे द्वार आजपासूनच उघडले आहे. रोजगाराच्या निर्मितीला चालना मिळणार आहे. आपल्या या नाविन्यपूर्ण संकल्पनेचे देशातील हे पहिले ड्रायपोर्ट नक्कीच यशस्वी होणार असल्याचा विश्वास केंद्रीयमंत्री नितीन गडकरी यांनी शुक्रवारी व्यक्त केला.
जालना जिल्ह्यातील जवसगाव (ता. बदनापूर) येथे जवाहरलाल नेहरू पोर्ट ट्रस्टच्या वतीने आयोजित 'ड्रायपोर्ट'च्या भूमिपूजन समारंभात ते बोलत होते. 'समुद्र किनारा नाही, पाणी नाही, आपल्या नद्याही वाहत नाहीत, मग हे बंदर कसे काय? तर ही संकल्पना उद्योजकांबरोबरच्या चर्चेदरम्यान सुचली,' असे गडकरी यांनी सांगितले.
देशातील प्रमुख उद्योगपतींनी पंतप्रधान नरेंद्र मोदी यांच्या उपस्थितीत बैठक झाली. मुंबईहून लंडन येथे कोणताही माल पाठवणे सोपे आहे, पण मुंबईहून दिल्लीला माल पाठवणे मोठे अवघड आणि खर्चिक असल्याचा मुद्दा या बैठकीत मांडला होता. यावर उत्तर शोधत असताना आपल्याला या 'ड्रायपोर्ट'ची संकल्पना सुचली आणि सर्व दृष्टीने अभ्यास केल्यानंतर आज देशातील या मराठवाड्यातील पहिल्या 'ड्रायपोर्ट'चे भूमिपूजन करण्याचे भाग्य लाभले आहे याचे मोठे समाधान वाटते, असे त्यांनी सांगितले. जालन्यातील ड्रायपोर्टच्या माध्यमातून जगातील कच्चे तेल आयात करून येथे तेल शुद्धीकरण करणारी रिफायनरी सुरू करणे सहज शक्य आहे. त्यामुळे देशांतर्गत खाद्य तेलाच्या
किंमती कमी होतील. आपल्या मराठवाड्यातील मोसंबी, डाळींब, द्रांक्षे, सीताफळ यांना जगातील बाजारपेठ सहजपणे उपलब्ध होईल.
जालन्यातील स्टील उद्योगाला संपूर्ण जगातील लोखंडी भंगार थेट आणि अतिशय स्वस्तात मिळेल. रोजगाराच्या नवनवीन संधी उपलब्ध होणार असल्याचे त्यांनी सांगितले. जेएनपीटीचे अध्यक्ष अनिल डिग्गीकर यांनी गडकरी यांचे स्वागत केले.
यावेळी व्यासपीठावर विधानसभा अध्यक्ष हरिभाऊ बागडे, जालन्याचे पालकमंत्री बबनराव लोणीकर, खासदार रावसाहेब दानवे, चंद्रकांत खैरे, ए. टी. नाना पाटील, पद्मभूषण डाॅ. बद्रीनारायण बारवाले, आमदार अर्जून खोतकर, माजी मंत्री राजेश,टोपे, आमदार संभाजी पाटील निलंगेकर, नारायण कुचे, संतोष दानवे, जयप्रकाश मुंदडा, जालना जिल्हा परिषदेचे अध्यक्ष तुकाराम जाधव, नगराध्यक्ष पार्वताबाई रत्नपारखे, जेएनपीटीचे अध्यक्ष अनिल डिग्गीकर, संचालक विवेक देशपांडे यांच्यासह जालना आणि औरंगाबाद येथील अनेक उद्योजक, परिसरातील शेतकरी मोठ्या संख्येने उपस्थित होते. जेएनपीटीचे संचालक जेष्ठ उद्योगपती रामचंद्र भोगले यांनी सूत्रसंचालन केले.
सव्वाचार तास उशीर
दुपारी साडेबारा वाजता होणाऱ्या या नियोजित कार्यक्रमाला तब्बल पावणेपाच वाजता सुरुवात झाली. कार्यक्रमास उशीर झाल्याने व्यासपीठावरील सर्वांचेच एकत्रित स्वागत करण्यात आले. भूमिपूजन आणि कोनशीलेचे अनावरण केल्यानंतर प्रकल्पाला जमिनी देणाऱ्या दरेगाव आणि जवसगाव गावांतील शेतकऱ्यांचा गडकरी यांनी प्रातिनिधिक सत्कार केला. त्यानंतर थेट माइकचा ताबा घेऊन भाषण केले.
मोबाइल अॅप डाउनलोड करा आणि राहा अपडेट
