म. टा. प्रतिनिधी, औरंगाबाद
मध्ययुगीन काळातील सामाजिक, धार्मिक व राजकीय परिस्थितीवर प्रकाश टाकणारे मोडी कागदपत्रांचे प्रदर्शन डॉ. बाबासाहेब आंबेडकर मराठवाडा विद्यापीठातील इतिहास वस्तूसंग्रहालयात सुरू झाले आहे. प्रदर्शन पाहण्यासाठी पहिल्या दिवशी इतिहास अभ्यासकांनी गर्दी केली.
डॉ. बाबासाहेब आंबेडकर मराठवाडा विद्यापीठातील इतिहास वस्तूसंग्रहालयात मोडी कागदपत्रांचे प्रदर्शन भरवण्यात आले आहे. या प्रदर्शनाचे उदघाटन शनिवारी दुपारी राज्यशास्त्र विभागाचे डॉ. बी. एस. वाघमारे यांनी केले. यावेळी इतिहास विभागप्रमुख डॉ. उमेश बगाडे, अभिलेखाकार प्रमुख डॉ. कुमार भवर, सुधीर बलखांडे व लिप्यंतरकार मच्छिंद्र चौधरी उपस्थित होते. या प्रदर्शनात पेशवे दप्तर, होळकर दप्तर, मराठा दप्तर, सातारा दप्तर आणि इंग्रज दप्तरातील पत्रे आहेत. १७७८ ते १८३० या काळातील कागदपत्रातून तत्कालीन सामाजिक, राजकीय व धार्मिक परिस्थिती लक्षात येते. सातारा दप्तरातील कागदपत्रे न्यायनिवाड्याशी संबंधित आहेत. शिवाय दरोडेखोरांचा बंदोबस्त करण्याबाबतची इंग्रज अधिकाऱ्यांना संस्थानिकांनी लिहिलेली पत्रे प्रदर्शनात आहेत. पैठणचे बापूजी नाईक भाकरे यांच्यासह हरी भक्ती, आबाजी नाईक वानवल, अप्पाजी शंकर भिडे हे सावकार पेशव्यांना कर्ज देत असत. या कर्जाबाबतची काही पत्रे प्रदर्शनात मांडली आहेत. या प्रदर्शनाला अभ्यासकांनी भेट द्यावी असे आवाहन करण्यात आले आहे.
मोबाइल अॅप डाउनलोड करा आणि राहा अपडेट
