म. टा. प्रतिनिधी, जालना
विद्यार्थ्यांना घडविण्याचे काम शालेय जीवनापासूनच शिक्षक करत असतात. डॉ. बद्रीनारायण बारवाले यांनी ग्रामीण भागात उभारलेल्या या शाळेमधून विद्यार्थ्यांना दर्जेदार व गुणवत्तापूर्ण शिक्षण मिळून या विद्यार्थ्यांनी जिल्ह्याचा देशात नावलौकिक करावा, असे प्रतिपादन महाराष्ट्र विधानसभेचे अध्यक्ष हरिभाऊ बागडे यांनी केले.
मांडवा (ता. बदनापूर) येथे डॉ. ब्रदीनारायण बारवाले विद्यालयाच्या नूतन इमारतीचे उदघाटन बागडे यांच्या हस्ते करण्यात आले. त्याप्रसंगी उपस्थितांना मार्गदर्शन करताना ते बोलत होते. व्यासपीठावर पाणीपुरवठा व स्वच्छता मंत्री बबनराव लोणीकर, खासदार रावसाहेब दानवे-पाटील, आमदार अर्जुनराव खोतकर, आमदार नारायण कुचे, आमदार राजेश टोपे, माजी आमदार कैलास गोरंट्याल, माजी आमदार अरविंद चव्हाण, माजी आमदार संतोष सांबरे, डॉ. बद्रीनारायण बारवाले, राजेंद्र बारवाले, रामेश्वर भांदरगे, नानासाहेब देशमुख, गोपाळ बोराडे, ठोंबरे, किसन सोलाट, नानासाहेब देशमुख आदींची उपस्थिती होती.
जिल्हा परिषदेच्या शाळेमध्ये विद्यार्थ्यांच्या गळतीचे प्रमाण खूप जास्त आहे. ग्रामीण भागात जिल्हा परिषदेच्या शाळेशिवाय विद्यार्थ्यांना पर्याय नाही. डॉ. बारवाले यांनी मांडवासारख्या ग्रामीण भागात सर्व सुविधांनीयुक्त व सुसज्ज अशी शाळा उभारली असून या शाळेचा फायदा परिसरातील विद्यार्थ्यांना होणार आहे. डॉ. बारवाले यांचे कार्य इतरांसाठी प्रेरणादायी असल्याचे बागडे यांनी यावेळी सांगितले.
राज्यात नापिकीमुळे शेतकऱ्यांच्या आत्महत्या होत आहेत. शासन शेतकऱ्यांसाठी अनेक योजना राबवित असले तरी शेतकऱ्यांनी त्यांच्या गावात, परिसरात, शेतात पडणाऱ्या प्रत्येक पावसाचा थेंब मुरविणे आवश्यक आहे. शेतकऱ्यांनी त्यांच्या विहिरींचे पुनर्भरण केल्यास भविष्यात त्यांना दुष्काळी परिस्थितीचा सामना करावा लागणार नसल्याचे त्यांनी यावेळी सांगितले.
पालकमंत्री बबनराव लोणीकर म्हणाले, 'आपला पाल्यांने उच्चशिक्षण घेऊन वरिष्ठ अधिकारी म्हणून प्रशासनात काम करावे अशी ग्रामीण भागातील पालकांची इच्छा असते. मांडवा येथे उभारण्यात आलेल्या शाळेमुळे विद्यार्थ्यांना दर्जेदार शिक्षण प्राप्त होणार असून विद्यार्थ्यांनी जिद्द, चिकाटी व परिश्रम करण्याची तयारी ठेवावी. शिक्षण हे वाघिणीचे दूध असून शिक्षणाच्या जोरावर संपूर्ण जग पादाक्रांत करता येते.'
राज्यातील दुष्काळी परिस्थितीवर मात करण्यासाठी गत वर्षात शासनाने जलयुक्त शिवार अभियान संपूर्ण राज्यात राबविले असून या अभियानास मोठ्या प्रमाणात लोकसहभाग प्राप्त झाला आहे. जालना जिल्ह्यातही हे अभियान २१२ गावात राबविल्याचे सांगून डॉ. बारवाले यांनी शासनाच्या या उपक्रमास हातभार लावावा, असे आवाहन लोणीकर यांनी यावेळी केले.
डॉ. ब्रदीनारायण बारवाले म्हणाले, 'ग्रामीण भागातील विद्यार्थ्यांना दर्जेदार व गुणवत्तापूर्ण शिक्षण मिळावे अशी बऱ्याच दिवसापासूनची इच्छा होती. आज मांडवा या गावात सर्व सुविधांनी युक्त शैक्षणिक इमारत उभारण्यात आली असल्याचे सांगून या माध्यमातून ग्रामीण भागातील निश्चितच घडेल.'
याप्रसंगी खासदार रावसाहेब दानवे-पाटील, आमदार अर्जुन खोतकर, आमदार राजेश टोपे यांनी मनोगत व्यक्त केले. कार्यक्रमाची सुरुवात कोनशिला अनावरण व दीपप्रज्वलनाने करण्यात आली. सूत्रसंचालन व आभार घुले यांनी मानले. कार्यक्रमास पालक, विद्यार्थी यांच्यासह परिसरातील नागरिक मोठ्या संख्येने उपस्थित होते.
मोबाइल अॅप डाउनलोड करा आणि राहा अपडेट
