‘आरक्षण नसल्यामुळे शेतकरी आत्महत्या’

February 16, 2016, 9:57 am

≫ Next: ‘पीकविमा भरपाईचा लाभ शेतकऱ्यांना द्या’

≪ Previous: शेतकरी संघटनेचाआंदोलनाचा इशारा

म. टा. प्रतिनिधी, लातूर

आत्महत्या करणाऱ्या शेतकऱ्यांमधे मराठा शेतकऱ्यांची संख्या मोठी आहे. आरक्षण मिळत नसल्यामुळे शेतकऱ्यांच्या आत्महत्या होत आहेत. आता मराठा आरक्षणासाठी आरपारची लढाई करायची आहे. या युद्धाला लातूरपासून सुरुवात करत आहे, असे प्रतिपादन आमदार नीतेश राणे यांनी मंगळवारी केले.
सकल मराठा आरक्षण समितीच्यावतीने लातूरात मराठा आरक्षण जागृती मेळाव्यात ते बोलत होते. मेळाव्याच्या अध्यक्षस्थानी आमदार अमित देशमुख होते. मेळाव्याच्या निमित्ताने लातूर शहरातून मोटारसायकल रॅलीही काढण्यात आली. या वेळी भगवानराव माकणे, माधव गंभीरे, अॅड. श्रीकांत सूर्यवंशी यांची भाषणे झाली. व्यासपीठावर माजी आमदार वैजनाथ शिंदे, वैजनाथ देशमुख, बाजार समितीचे सभापती ललितभाई शहा यांची उपस्थिती होती.
नीतेश राणे म्हणाले, 'राज्य शासन मराठा द्वेषी आहे. राज्याच्या मंत्रिमंडळात फक्त चार मराठा असून, बाकी सर्व ब्राह्मण आहेत. मराठा समाजावर अशी वेळ का आली? याला हे लोक जबाबदार आहेत, की आपण याचा विचार करायला हवा. 'साडेतीन टक्के' आम्हाला आव्हान देणार का? आम्ही ३२ टक्के आहोत.' राष्ट्रीय स्वयंसेवक संघावरही त्यांनी टीका केली.
अध्यक्षीय समारोप करताना आमदार अमित देशमुख म्हणाले, 'मराठा आरक्षणची समस्या ही आजची नसून, ती अनेक वर्षांची आहे. ती समस्या सोडविण्याची मुहर्तमेढ विलासराव देशमुख यांनी रोवली आहे. एक घाव दोन तुकडे करण्याची वेळ आल्यानंतर नारायण राणे यांच्या अध्यक्षतेखाली अभ्यास समितीचा निर्णय झाला होता. आत्महत्या करणारे शेतकरी हे मराठा समाजातील आहेत, हे सत्य आहे.' कार्यक्रमाचे सूत्रसंचालन केशव गंभीरे यांनी केले.

Latest Images