म. टा. प्रतिनिधी, औरंगाबाद
जगाला शांतीचा संदेश संदेश देणारे तथागत भगवान गौतम बुद्ध यांची जयंती शहरात शनिवारी मोठ्या उत्साहात साजरी करण्यात आली. बुद्धवंदना, प्रवचन, भीमगीते, अभिवादन फेरी यासह विविध कार्यक्रमांचे आयोजन करण्यात आले होते.
सिद्धार्थ उद्यानातील भव्य अशा भगवान बुद्धांच्या पुतळ्यास पुष्पहार अर्पण करून अभिवादनासाठी पहाटे पाचपासून गर्दी झाली. याठिकाणी महापरित्राण पाठ, वंदना झाल्यानंतर ध्वजारोहण करण्यात आले, अशी माहिती महासंघाचे जिल्हाध्यक्ष अशोक कांबळे यांनी दिली. क्रांतिचौकातून भारतीय बौद्ध महासभा, समता सैनिक दल व भिक्खू संघाच्या वतीने तथगतांच्या मूर्तीची मिरवणूक काढण्यात आली. नूतन कॉलनी, सिल्लेखाना, पैठणगेट, गुलमंडी, सिटीचौक, भडकलगेट मार्गे ही मिरवणूक सिद्धार्थ उद्यानात दाखल झाली. उद्यानातील भव्य बुद्धमूर्तीला अभिवादन करून मिरवणुकीचा सांगता सोहळा पार पडला. दुपारनंतर या ठिकाणी भारतीय बौद्ध महासभेतर्फे धम्मदीक्षा समारंभाचे आयोजन करण्यात आले होते. महासभेतर्फे आयोजित केलेल्या सात दिवसीय श्रामणेर व बौद्धाचार्य प्रशिक्षण शिबिरातील श्रामणेर व बौद्धाचार्यांना प्रमाणपत्र प्रदान करण्यात आले. महापालिकेच्या वतीने महापौर त्र्यंबक तुपे, अतिरिक्त आयुक्त रमेश पवार, उपायुक्त रवींद्र निकम यांच्यासह रतनकुमार पंडागळे, माजी उपमहापौर प्रकाश निकाळजे, समता सैनिक दलाचे डी. व्ही. खिल्लारे, दिनकर ओंकार, किशोर जोहरे यांच्यासह शेकडो उपासकांनी अभिवादन केले.
बुद्धविहारांमध्ये त्रिशरण, पंचशील गाथा पठन
बुद्धलेणी येथे भंदन्त विशुध्दानंद बोधी महाथेरो यांच्या उपस्थितीत कार्यक्रम घेण्यात आला. जंयती निमित्त शहराच्या विविध भागात असलेल्या बुद्धविहारात बुद्धवंदना त्रिशरण पंचशील गाथाचे पठण करण्यात आले. चौका घाट येथील लोकुत्तरा बुद्ध विहारात बुद्धाच्या चरणी लिन होण्यासाठी मोठ्या संख्येने बुद्ध उपासक आणि उपासिका यांनी गर्दी केली. भंदन्त बोधीपालो महाथेरो, भन्ते आनंद बोधी महाथेरो, भंदन्त काश्यप थेरो, ज्ञानरक्षित, भिक्खू धम्मबोधी, भिक्खू रेवत, धम्मज्योत यांच्या प्रमुख उपस्थितीत पंचशील त्रिशरण व महापूजा झाली. त्यानंतर भंदन्त बोधीपालो महाथेरो यांचे प्रवचन झाले.
राष्ट्रीय समाज पक्ष
विठ्ठलनगर येथे आयोजित कार्यक्रमात भगवान गौतम बुद्ध यांना अभिवादन करण्यात आले. संतोष कोल्हे, शशिकांत शिंदे, संतोष लाखे, दिलीप रिठे, विष्णू शिंदे, किशोर माळी, रवी वैद्य, नारायण रिठे, सुरेश कटारे आदी उपस्थित होते.
काँग्रेस
काँग्रेसतर्फे भगवान बुद्ध जयंतीनिमित्त सिद्धार्थ उद्यान येथे सामूहिक त्रिशरण पंचशील घेण्यात आले. वॉर्ड क्रमांक १६ चे अध्यक्ष, आरोग्य सेवा सेलचे शहर सरचिटणीस आनंद भामरे, रोहन थोरात, अमित त्रिभुवन, अॅड. राजेंद्र वाघ, विशाल लांडगे, कडुबा राऊत, दादाराव बोर्डे, सॅम हिवाळे, शेखर शिर्के, विक्री भटकर आदी उपस्थित होते.
स्वाभिमान दलित पँथर
पँथरतर्फे तथागत भगवान गौतम बुद्ध जयंतीनिमित्त सिद्धार्थ उद्यान येथे अभिवादन करण्यात आले तसेच बुद्धवंदना घेण्यात आली. अध्यक्ष मिलिंद बोर्डे, संदीप अंगुरे, सचिन नरवडे, चंद्रकांत पारखे, खालीद शेख, पंकज खरात, विनोद बनकर, संदीप जाधव, समाधान गरुड आदी उपस्थित होते.
मोबाइल अॅप डाउनलोड करा आणि राहा अपडेट
म. टा. प्रतिनिधी, लातूर
म. टा. प्रतिनिधी, उस्मानाबाद
