ट्रकमुळे तुटून लोबंकळलेली वीज तार गळ्यात अडकल्याने एका तरुणाचा मृत्यू झाला. ही घटना तालुक्यातील पेंडगाव येथे सोमवारी दुपारी दोन वाजता घडली. नारायण दादा जिवरग (वय ३६, रा. निमखेडा), असे मृत तरुणाचे नाव आहे.
मोबाइल खरेदीसाठी नारायण जिवरग हे बोरगांव अर्ज येथील बँकेतून पैसे काढून परत जात होते. त्यावेळी पेंडगाव येथे जिल्हा परिषद शाळेजवळ सौर उर्जा दिव्याच्या खांबावरून रस्त्यावर लोंबकळणारी विजेची तार त्यांना दिसली नाही. ती जिवरग यांच्या गळ्यात अडकली. ते घटनास्थलीच बेशुद्ध पडले. ही घटना पाहणाऱ्या काही ग्रामस्थांनी त्यांना ताबडतोब बोरगांव अर्ज येथील डॉ. जैतमहाल यांच्या दवाखान्यात आणले. तेथे प्राथमिक उपचार करून त्यांना औरंगाबाद येथील घाटी हॉस्पिटलमध्ये पाठवण्यात आले. पण, तेथे त्यांना तपासून मृत घोषित करण्यात आले. त्यांच्यामागे आई, वडील, पत्नी, एक मुलगी, एक मुलगा असा परिवार आहे. ते घरातील एकमेव कमावते होते. या घटनेची नोंद वडोद बजार पोलिस ठाण्यात करण्यात आली असून सहाय्यक पोलिस निरीक्षक नरहरी शिंदे हे पुढील तपास करत आहेत.
असा झाला अपघात
पेंडगाव येथील जिल्हा परिषद शाळेच्या एका खोलीतून दुसऱ्या खोलीत रस्ता ओलांडून वीज पुरवठा घेण्यात आला आहे. ही तार ताठ राहण्यासाठी दोन्ही बाजूने एक लोखंडी तार दोन्ही बाजुने सौर उर्जा दिव्यांच्या खांबांना बांधण्यात आली आहे. वीजवाहक तार परळी येथून वीट घेऊन आलेल्या ट्रकला (आर.जे. ११, ४९६५) अडकून तुटली. पण आधारासाठी बांधलेली तार न तुटला खांब वाकून लोंबकळली. ट्रक निघून गेल्यानंतर नारायण जिवरग मोटारसायकलवरून (एम. एच २० बी झेड. ३३२७) या रस्त्यावरून जात होते. वीज पुरवठा उतरलेली तार त्यांच्या गळ्याभोवती अडकली व ते जमिनीवर कोसळले.
मोबाइल अॅप डाउनलोड करा आणि राहा अपडेट
