म. टा. प्रतिनिधी, औरंगाबाद
कोपर्डी (ता. कर्जत) येथील बलात्कार व हत्या प्रकरणाचे शहरात तीव्र पडसाद उमटले. संभाजी ब्रिगेडने दिवसभर धरणे आंदोलन केले. एपीआय कॉर्नर येथे बसवर दगडफेक झाल्यामुळे पोलिस आयुक्त अमितेशकुमार यांनी मराठा संघटनांच्या पदाधिकाऱ्यांशी तातडीने चर्चा केली.
अमितेशकुमार यांच्यासोबतच्या बैठकीला छत्रपती शिवाजी प्रबोधिनीचे संचालक बाळासाहेब सराटे, प्रा. चंद्रकांत भराट, संभाजी ब्रिगेडचे राहुल बनसोड यांच्यासह कार्यकर्ते उपस्थित होते. कोपर्डी गावातील अल्पवयीन मुलीवरील अत्याचार प्रकरणी सरकारने मागण्या मंजूर केल्या आहेत. विधानसभेतही सरकारने घोषणा केली आहे. याप्रकरणी घटनात्मक मार्गाने आंदोलन करण्यास प्रशासनाने अडथळा आणला नाही. कायदेशीर चौकटीत आंदोलन करावे व कायदा हातात घेऊन बेकायदा कृत्ये करू नये. तसेच सार्वजनिक मालमत्तेचे नुकसान करू नये, असे आवाहन मराठा संघटनांनी बैठकीनंतर केले. सरकारने न्याय प्रक्रियेत दिरंगाई केल्यास राज्यभर तीव्र आंदोलन करण्यात येईल असे सराटे यांनी निवेदनात म्हटले आहे.
एसटी महामंडळाच्या बसवर दगडफेक
कोपर्डीप्रकरणी सोमवारी दुपारी साडेबाराच्या सुमारास एपीआय कॉर्नर येथे तरुणांच्या टोळक्याने बसवर घोषणाबाजी करत दगडफेक केली. याप्रकरणी सिडको एमआयडीसी पोलिस ठाण्यात गुन्हा दाखल करण्यात आला आहे. जाफ्राबाद ते सिडको ही बस एपीआय कॉर्नरजवळ आल्यानंतर आठ ते दहा जणांच्या टोळक्याने ही बस अडवली. जोरदार घोषणाबाजी करत या बसच्या समोरील व मागील काचांवर तुफान दगडफेक केली. यानंतर हे टोळके पसार झाले. तेथील एका दुकानाबाहेर असलेल्या सीसीटीव्ही कॅमेऱ्यामध्ये हा प्रकार कैद झाला. पोलिसांनी दगडफेक करणाऱ्या टोळक्याची ओळख पटवली आहे. अखिल भारतीय शिवक्रांति संघटनेचे सुनील कोटकर व सहकाऱ्यांनी ही दगडफेक केल्याचे चित्रित झाले असून याप्रकरणी बसचालकाच्या तक्रारीवरून पोलिस ठाण्यात दंगल करणे व सार्वजनिक मालमत्तेचे नुकसान केल्याप्रकरणी गुन्हा दाखल करण्यात आला आहे. पोलिस निरीक्षक श्रीपाद परोपकारी यांनी ही माहिती दिली.
बुलंद छावा युवा परिषद
समाजाचा भावनिक उद्रेक बघता कोपर्डी प्रकरणी दोषींवर जलदगती न्यायालयात खटला चालवून तत्काळ फाशीचा निकाल लावण्यात यावा, अशी मागणी बुलंद छावा मराठा युवा परिषदेने केली. याबाबत विभागीय आयुक्त उमाकांत दांगट यांना निवेदन देण्यात आले. पीडित कुटुंबाला मुख्यमंत्री सहाय्यता निधीतून २५ लाख रुपये मदत करावी. भविष्यात पुन्हा अशी घटना घडू नये म्हणून गृहखाते आणि प्रशासनाने काळजी घ्यावी. सैराटसारख्या चित्रपटामुळे समाजाचे संतुलन बिघडत असून, या चित्रपटाच्या प्रसारणावर बंदी घालावी, असे निवेदनात नमूद करण्यात आले आहे. निवेदनावर नितीन शेळके, सतीश वेताळ, मनोज गायके, योगेश देशमुख यांची स्वाक्षरी आहे.
'एनएसयूआय'चे निवेदन
अहमदनगर जिल्ह्यातील कोपर्डी घटनेने महाराष्ट्राच्या पुरोगामित्वाची आणि कायदा-सुव्यवस्थेची लक्तरे वेशीवर टांगली आहेत. 'दुर्मिळातील दुर्मिळ' प्रकरण हाताळून आरोपींना कठोर शिक्षा करावी, अशी मागणी नॅशनल स्टुंडटस युनियन ऑफ इंडिया संघटनेने केली आहे. याबाबत विभागीय आयुक्त उमाकांत दांगट यांना निवेदन देण्यात आले. आरोपी कोणत्याही जातीधर्माचा असला तरी योग्य कायदेशीर कारवाई करून पीडित बालिकेला न्याय द्यावा असे निवेदनात म्हटले आहे. यावेळी महाराष्ट्र प्रदेश प्रतिनिधी राहुल पाटील, जिल्हाध्यक्ष मुझाहेद पटेल, विद्यापीठ प्रमुख नीलेश आंबेवाडीकर, सागर साळुंके, बरकत अली पठाण, सूरज निकम, धनंजय देशमुख, अमित संत्रे, रोहित कांबळे उपस्थित होते.
आरोपींना फाशी द्या
कोपर्डी प्रकरणात फक्त एक आरोपी अटकेत असून बाकीचे मोकाट आहेत. या आरोपींना फाशीची शिक्षा द्यावी, अशी मागणी राष्ट्रवादी युवक काँग्रेसने जिल्हाधिकाऱ्यांकडे केली. नगर जिल्ह्याचे पालकमंत्री राम शिंदे यांची शासनाने तत्काळ हकालपट्टी करावी, सोशल मीडियावर दलित विरुद्ध मराठा वाद निर्माण करण्याचे काम काही जातीयवादी लोक करत आहेत. त्यावर तत्काळ आळा घालावा. वेळोवेळी नगर जिल्ह्यात अशा घटना घडत असून, यासाठी नगर हा अत्याचारग्रस्त जिल्हा म्हणून घोषित करावा, अशी मागणी डॉ. निधी पांडेय यांना दिलेल्या निवेदनात करण्यात आली. त्यावर विजय वाहुळ, विलास मगरे, बबलू पाटील आदींच्या स्वाक्षऱ्या आहेत.
संभाजी ब्रिगेडची धरणे
कोपर्डी अत्याचार प्रकरण पुरोगामी महाराष्ट्राला काळिमा फासणारे आहे. या प्रकरणातील गुन्हेगारांना फाशीची शिक्षा झाली पाहिजे, अशी मागणी संभाजी ब्रिगेडने केली. या मागणीसाठी सोमवारी जिल्हाधिकारी कार्यालयासमोर संघटनेच्या पदाधिकाऱ्यांनी धरणे आंदोलन केले. यावेळी जिल्हाध्यक्ष रमेश गायकवाड, राहुल बनसोड, सचिन मगर, संजय सोमवंशी, दत्तात्रय कराड, रवी बोचरे, अजिनाथ गाडेकर, सचिन गवई, सुनील वाघ, अनिल हिरडे, आकाश पाटील, अच्युत जाधव, विशाल वरकड, भागवत भोरे आदी उपस्थित होते. निर्भया अत्याचार व हत्याकांड प्रकरणात कायद्यात बदल करण्यात आला होता. त्यानुसार या प्रकरणाचा जलद गतीने तपास करुन कारवाई करावी. खटला फास्ट्र ट्रॅक कोर्टात चालवावा, सरकारी वकील अॅड. उज्ज्वल निकम यांची नियुक्ती करावी आणि पीडित कुटुंबाला २५ लाख रुपये मदत करावी या प्रमुख मागण्या करण्यात आल्या. आरोपींच्या कुटुंबाची सविस्तर चौकशी करून कठोर कारवाई करावी, पोलिसांनी पीडित कुटुंबाला संरक्षण देण्याऐवजी आरोपीच्या कुटुंबाला संरक्षण दिल्याबद्दल संघटनेने तीव्र निषेध केला. या प्रकरणाची नैतिक जबाबदारी स्वीकारून देवेंद्र फडणवीस यांनी मुख्यमंत्री पदाचा राजीनामा द्यावा असेही संघटनेने निवेदनात म्हटले आहे.
आरोपींना कठोर शिक्षा करा: अभविप
कोपर्डीत प्रकरणाचा खटला जलदगती न्यायालयात चालवून आरोपींना कठोर शिक्षा करा, अशी मागणी अखिल भारतीय विद्यार्थी परिषदेने केली आहे. अभविपतर्फे डॉ. बाबासाहेब आंबेडकर मराठवाडा विद्यापीठ व देवगिरी इंजिनीअरिंग कॉलेज परिसरात निदर्शने करण्यात आली. ५० टक्के महिलांना आरक्षणाच्या गोष्टी केल्या जात आहेत. त्याचवेळी महिलांवर अत्याचाराच्या घटना घडत आहेत. कोपर्डी येथे अल्पवयीन मुलीवर झालेला अत्याचार व हत्याही निंदनीय आहे. ही केस जलदगती न्यायालयात चालवावी व अत्याचार करणाऱ्या नराधमांना कठोर शिक्षा करावी मागणी यावेळी करण्यात आली. शिवराज मानेगोपाळे, पूर्वा पाटील, विवेक पवार, मोनाली सुकटे, दीक्षा वार, किरण जाधव, रुपाली मोरे यांची उपस्थिती होती.
मोबाइल अॅप डाउनलोड करा आणि राहा अपडेट
म. टा. प्रतिनिधी, उस्मानाबाद
