कंटेनरमधून मुंबईला जाणारे सुमारे १४ टन मांस देवगाव रंगारी पोलिसांनी रविवारी रात्री पकडले. हे मांस पोलिस आयुक्तालय हद्दीतील जांभाळा परिसरातून आणण्यात आले होते, अशी माहिती समोर येत असून कंटेनरचालकास अटक करण्यात आली आहे.
देवगाव रंगारी पोलिस ठाण्याचे सहायक फौजदार ए. एस. जावळे हे सहकारी कर्मचाऱ्यांसह रात्री साडेबाराच्या सुमारास औरंगाबाद-शिऊर रोडवर गस्त घालत होते. त्यावेळी देवगाव शिवारातील खडकी पुलावर त्यांना एक कंटेनर (एम. एच. ४६,एफ ५३६९) हा भरधाव वेगाने जात असल्याचे निदर्शनास आले. त्यामुळे पोलिसांनी कारवाई करत कंटेनर थांबवून चालकाकडे चौकशी केली. त्यावेळी कंटेनरमध्ये सुमारे १४ टन मांस असल्याचे समोर आले. ही बाब समजताच सहायक पोलिस निरीक्षक राजश्री आडे, पोलिस उपनिरीक्षक एल. आर. कांबळे यांनी घटनास्थळी धाव घेतली. तपासणीत खाकी रंगाच्या बॉक्समध्ये मांस ठेवण्यात आल्याचे समोर आले.
कंटेनरचालक मुख्तार मोहम्मद अमीन (रा. उत्तरप्रदेश) याने चौकशीत हा कंटेनर रायगड येथील छोट्टन अशरफी यांच्या मालकीचा असून मांस औरंगाबाद जवळील जांभाळा येथील आजाद कुरेशी याच्याकडून आणल्याचे पोलिसांना सांगितले. चालकाकडे मांस वाहतूक व बाळगण्याचा परवाना सापडला नाही. त्यामुळे पोलिस अधीक्षक नवीनचंद्र रेड्डी यांच्या मार्गदर्शनाखाली देवगाव रंगारी पोलिसांनी कारवाई करत मुख्तार मोहम्मद अमीन, कंटेनर मालक छोट्टन अशरफी व जांभाळा येथील आजाद कुरेशी या तिघांविरुद्ध न्हा दाखल केला. अटकेत असलेल्या अमीन याला कन्नड कोर्टाने २८ सप्टेंबरपर्यंत पोलिस कोठडी सूनावली, अशी माहिती आडे यांनी दिली.
मांसाची तपासणी
दरम्यान, कंटेनरमधील मांस हे नेमके कोणत्या जनावराचे आहे, हे अद्याप समजू शकले नाही. तपासणीसाठी काही नमुने मुंबई येथील प्रयोगशाळेत पाठविण्यात आले आहे, अशी माहिती पोलिसांनी दिली.
मोबाइल अॅप डाउनलोड करा आणि राहा अपडेट
