कटकट गेट या ऐतिहासिक दरवाज्यात होणाऱ्या वाहतूक कोंडीचा प्रश्न अखेर मंगळवारी सुटला. गेटच्या दोन्ही बाजूला प्रस्तावित रस्त्यासाठी मालमत्तांचे भूसंपादन करण्यात आले. त्याचबरोबर काही अतिक्रमित दुकाने लोकांनी स्वतःहून हटविली. किरकोळ वाद वगळता ही भूसंपादन प्रक्रिया शांततेत पूर्ण करण्यात आली.
महापालिकेचे अतिक्रमण पथक मंगळवारी सकाळी नऊच्या सुमारास कटकट गेट परिसरात पोलिस बंदोबस्त घेऊन पोचले. कटकट गेटच्या दोन्ही बाजूने प्रस्तावित ९ मीटरच्या रस्त्यावरील दुकाने हटविण्याची कारवाई सुरू करण्यात आली. नागरिकांनी मालमत्ता हटविण्यासाठी वेळ देण्याची मागणी केल्यानंतर काही काळासाठी कारवाई थांबविण्यात आली. नागरिकांनी आपल्या मालमत्ता स्वतःहून हटविण्यास सुरवात केली. त्यांना वेळ देऊनही मालमत्ता वेळेत हटविल्या जान नसल्याने महापालिकेने बुलडोजर लावण्याचा निर्णय घेतला. मालमत्ताधारकांनी बुलडोजर लावू नका, आम्ही आमचे सामान काढून घेतो. दरवाज्यालगतची भिंत आधी पाडा, अशी भूमिका काही नागरिकांनी घेतली. यामुळे महापालिका अधिकारी आणि नागरिक यांच्यात वाद झाला होता. काही वेळेसाठी तणाव निर्माण झाला होता. नगरसेवक अजीम अहेमद यांनी मध्यस्थी केल्यानंतर हा वाद मिटला. त्यानंतर मालमत्ता हटविण्याची कारवाई सुरू करण्यात आली.
कटकट गेटच्या डाव्या बाजूला असलेली दुकाने, मालमत्ता हटविण्यात आल्या. हा रस्ता मोकळा करण्यासाठी नगरसेवक अहेमद, नगरसेवक नर्गिस फिरदौस यांनी महापालिका आयुक्त आणि नागरिकांची बैठक घेतली होती. या प्रस्तावित रस्त्यावरील चार मालमत्ता धारकांनी टीडीआर घेण्याचा निर्णय घेतला. एका मालमत्ताधारकाने एफएसआय घेतला. कटकट गेटच्या बाहेरची बाजू ही माजी नगरसेवक मुजीब आलम शहा यांच्या मालकीची असून, त्यांनी रेखांकनामध्ये काही बदल करून देण्याची मागणी महापालिकेकडे केली. त्याप्रमाणे कार्यवाही करण्याचे पालिकेने मान्य केल्यानंतर भूसंपादन प्रक्रियेला सुरुवात करण्यात आली. या प्रस्तावित रस्त्यावरील अतिक्रणधारकांनी स्वतःहून अतिक्रमण हटविली. कार्यकारी अभियंता सिकंदर अली यांच्यासह उपायुक्त रवींद्र निकम, प्रभारी नगररचना संचालक ए. बी. देशमुख यांच्यासह महापालिकेचे अतिक्रमण हटाव पथक आणि पोलिस कर्मचारी या कारवाईच्यावेळी उपस्थित होते.आमदार इम्तियाज जलील यांनी कारवाईची पाहणी करून मालमत्ताधारकांची भेट घेतली केली. याशिवाय महापौर त्र्यंबक तुपे यांनीही या कारवाईची पाहणी केली.
गल्लीला जाण्यासाठी रस्ता झाला मोकळा
शरीफ कॉलनी वॉर्डात कटकट गेटच्या बाजूला असलेल्या गल्लीतील नागरिकांना या कारवाईमुळे आनंद झाल्याचे एस. एन. पठाण यांनी सांगितले. कटकट गेटमध्ये वारंवार कोंडी होत असल्याने गल्लीमध्ये जाण्यासाठी रस्ता उपलब्ध होत नव्हता. गेटच्या दोन्ही बाजूने रस्ता रस्ता झाल्याने गल्लीमध्ये जाण्यासाठी रस्ता मोकळा झाल्याचे पठाण यांनी सांगितले.
रस्त्याचे कामाचे उद्घाटन आज होणार
जिल्हा विकास समितीने या रस्त्यासाठी ५० लाख रुपये दिले आहेत. या कामासाठी महापालिका ५० टक्के रक्कम देणार आहे. रस्त्याच्या कामाचे उद्घाटन पालकमंत्री रामदास कदम यांच्या हस्ते बुधवारी केले जाणार आहे.
मोबाइल अॅप डाउनलोड करा आणि राहा अपडेट
