ऐतिहासिक बीबी का मकबरा परिसर सायलेन्स झोन करण्याचा निर्णय मंगळवारी महापालिकेच्या हेरिटेज कमिटीच्या बैठकीत घेण्यात आला. मकबरा, औरंगाबाद लेणी ही वारसास्थळे असल्यामुळे त्याच्या परिसरात हेलिकॉप्टरच्या फेऱ्यांवरही निर्बंध घालण्यात आले.
हेरिटेज कमिटीची बैठक महापालिकेचे आयुक्त ओम प्रकाश बकोरिया यांच्या अध्यक्षतेखाली झाली. बैठकीला कमिटीचे अध्यक्ष जयंत देशपांडे, समितीचे सदस्य डॉ. दुलारी कुरैशी यांच्यासह पुरातत्व विभाग, हर्सूल जेल आणि महापालिकेचे अधिकारी उपस्थित होते.
बीबी का मकबरा या विषयावर बैठकीत चर्चा झाली. संपूर्ण मकबरा परिसर सायलेन्स झोन म्हणून जाहीर करण्याचा निर्णय बकोरिया यांनी घेतला. मकबऱ्यापासून शंभर मीटर क्षेत्रात होणारी नवीन बांधकामे तत्काळ पाडून टाकण्यात येतील, असे बकोरिया यांनी स्पष्ट केले. मकबरा परिसरातील सुमारे दीडशे बांधकामांना नोटीस दिली आहे. त्याची माहिती महापालिकेलाही देण्यात आली, पण ती बांधकामे महापालिकेचे अधिकारी पाडत नाहीत, असे पुरातत्व खात्याच्या अधिकाऱ्यांनी लक्षात आणून दिले. त्यावर, ही बांधकामे देखील लवकरच पाडण्यात येतील, असे बकोरिया यांनी स्पष्ट केले.
औरंगाबाद शहरात एअर एलोरा एव्हिएशन या संस्थेने नव्याने हेलिकॉप्टर सेवा सुरू केली आहे. मकबरा आणि औरंगाबाद लेण्याच्या परिसरातून हेलिकॉप्टर फिरवले जाणार आहे. या दोन्ही जागतिक वारसा स्थळांच्या परिसरातून हेलिकॉप्टर फिरवण्यास हेरिटेज कमिटीच्या बैठकीत आक्षेप घेण्यात आला. हेलिकॉप्टरच्या आवाजामुळे सुपरसॉनिक ध्वनी लहरी निर्माण होतात. त्यामुळे वास्तूंवर भेगा पडण्याची शक्यता असते. चार-पाच वर्षांनंतर या भेगा स्पष्टपणे दिसतात. त्यामुळे या स्थळांच्या परिसरातून हेलिकॉप्टर फिरवण्यावर निर्बंध घालण्याचा निर्णय देखील बैठकीत घेण्यात आला.
२५० मीटर अंतर ठेवा
बीबी का मकबरा, औरंगाबाद लेणी यांपासून हेलिकॉप्टरचे अंतर २०० ते २५० मीटर ठेवा, अशी सूचना पालिकेचे आयुक्त ओम प्रकाश बकोरिया यांनी एअर एलोरा एव्हिएशन कंपनीचे व्यवस्थापक कृष्णा कदम यांना दूरध्वनीवरून केली, अशी माहिती जनसंपर्क विभागातून देण्यात आली.
मोबाइल अॅप डाउनलोड करा आणि राहा अपडेट